Այսօր Հենարան ակումբում հոգեբան Կարինե Նալչաջյանը, երկրաշարժից տուժածներ Գարուշ Դանիելյանը, Արթուր Գրիգորյանը և «Փյունիկ» ՀԿ-ի նախագահ Հակոբ Աբրահամյանը խոսեցին «Սպիտակի երկրաշարժը 22 տարի անց…» թեմայով:
22 տարի առաջ ստեղծված «Փյունիկ» ՀԿ-ն իր առջև նպատակ էր դրել օգնել, աջակցել երկրաշարժի հետևանքով հաշմանդամ դարձած մարդկանց:
«Այսօր մեծ հաջողություններ են գրացվել, բազմաթիվ մարդիկ, ովքեր երկրաշարժի հետևանքով հաշմանդամություն են ձեռք բերել, թե՜ սպորտի, թե՜ արվեստի բնագավառներում մեծ հաջողությունների են հասել: Մեր կազմակերպության շնորհիվ շատ մարդիկ, երեխաներ դուրս եկան այդ հոգեբանական վիճակից, անլիարժեքության բարդույթներից ազատվեցին»,-նշեց «Փյունիկ» ՀԿ-ի նախագահ Հակոբ Աբրահամյանը:
Հոգեբան Կարինե Նալչաջյանը վստահ է, որ եթե մենք «աղետի գոտու բնակիչ» արտահայտուաթյան փոխարեն օգտագործենք երկրաշարժ տեսած, բնական աղետից տուժած արտահայտությունները, ապա այդ հոգեբանական ծանր ապրումներն ավելի հեշտ կլինի հաղթահարել: «Մարդը համարվում է բնության ամենափխրուն և միևնույն ժամանակ ամենադիմադրողական պոտենցիալ ունեցող արարածը: Հետազոտությունները ցույց են տալիս, որ այդպիսի աղետներից հետո ազգաբնակչության մոտ 90 տոկոսը ունենում է հետտրավմատիկ վիճակ: Մենք ինքներս ունենք վերականգնողական ուժեր, սակայն երբ մարդուն անընդհատ ասում ես, որ դու աղետ տեսած ես, որ դու աղետի գոտու բնակիչ ես, նա հոգեբանորեն ավելի ուշ կհաղթահարի իր ապրածը, տեսածը: Երկրաշարժի հետևանքները հոգեբանորեն շարունակվում են»,- ավելացրեց հոգեբանը: