ՍԴՀԿ ատենապետ, ՀԱԿ անդամ Լյուդմիլա Սարգսյանը բացառեց Ռոբերտ Քոչարյանի քաղաքական դաշտ վերադարձը՝ նշելով, որ վերջինս բարոյական իրավունք չունի վերադառնալու և ակնկալելու, որ կարող է մի օր նորից իշխանության հասնել:
Լրագրողների հետ հանդիպման ժամանակ, որպես հիմնավորում իր այդ դիտարկմանը, Սարգսյանը նշեց. «Ոչ մեկի համար գաղտնիք չէ, թե ով է կազմակերպել Մարտի 1-ի սպանդը: Ես չեմ կարծում, որ նա այնքան բանական է, որ հետ կանգնի իր վերադարձի նպատակից, բայց կարծում եմ, որ ժողովուրդը նրան թույլ չի տա»:
Ներքաղաքական զարգացումների հասունացմանն անդրադառնալով` Սարգսյանը նշեց, որ դաշտում այսօր երկու ուժ կա` իշխանական համակարգ և Հայ ազգային կոնգրես. «Կուլմինացիան շատ շուտ կհասունանա, մենք այդ կերպ մտածելու համար ունենք բավական լուրջ հիմքեր ու գործունեության մեխանիզմներ և կուլմինացիայի պարագայում կարող ենք հասարակության ավելի պասսիվ հատվածին դարձնել ակտիվ»: