«Ժառանգություն» կուսակցությունը բաց է քաղաքական տարբեր ուժերի հետ համագործակցության համար: Այսօր կայացած մամուլի ասուլիսի ժամանակ այս մասին հայտարարեց կուսակցության մամուլի քարտուղար Հովսեփ Խուրշուդյանը:
«Համագործակցության ձևաչափերի մասին խոսելը դեռևս շուտ է, դեռևս վաղաժամ է խոսել նաև` ում հետ հատկապես կհամագործակցենք: Միաժամանակ` չենք բացառում քաղաքական համագործակցությանն ուղղված ակցիաներ: Միայն մեր ընտրազանգվածի պատվերին ենք սպասում, որպեսզի ավելի ակտիվ գործողություններ ձեռնարկենք»,- նկատեց նա:
Խուրշուդյանը նկատեց, որ «Ժառանգություն» կուսակցությունը, հակառակ որոշ մարդկանց պնդումների, լայն ժողովրդականություն է վայելում: «Մեր հարցումների համաձայն` եթե ընտրությունները կայանան վաղը, ամենքիչը կրկնակի թվով, քան ներկայումս ենք, մուտք կգործենք խորհրդարան»,- վստահեցրեց կուսակցության ներկայացուցիչը` խորհուրդ տալով չլսել ամեն տեսակ «տնաբույծ» քաղաքագետների և սոցիոլոգների գնահատականները, թե իբր «Ժառանգությունն» առաջիկա խորհրդարանական ընտրություների ընթացքում խորհրդարան դժվար թե մուտք գործի:
Անդրադառնալով ՀԱԿ-ի հետ հնարավոր համագործակցության թեմային` Հովսեփ Խուրշուդյանը նկատեց, որ ոչ մի ուժի դեմ դռները չպետք է փակել: «Եթե համագործակցության արդյունքում հնարավոր է հասնել ժողովրդի հիմնական պահանջներին, ինչո՞ւ չհամագործակցել»,- հռետորական հարց հնչեցրեց նա:
Հիշեցնենք, որ խորհրդարանական հերթական ընտրությունները Հայաստանում տեղի կունենան 2012 թվականի մայիսին: