ԱՄՆ նախկին փոխնախագահ և 2000-ին նախագահի թեկնածու Ալբերտ Գորը, որը 2007 թ. ստացել է Նոբելյան մրցանակ, հայտարարել է, որ պաշտպանում է ԱՄՆ-ում ծավալվող «Օկուպացնենք Ուոլ Սթրիթը» զանգվածային ակցիաների մասնակիցներին: Այս մասին հաղորդում է France Presse գործակալությունը:
«Ինչպես բնապահպանական, այնպես էլ տնտեսական ճգնաժամի ընթացքում մեր առաջնորդներն իրականացրել են մի քաղաքականություն, որը չի լուծում մեր խնդիրները: Շարժումը, որ կազմակերպվել է սովորական մարդու կողմից, և որը ի ցույց է դնում մեր համակարգի թերությունները, առաջին քայլն է ճիշտ ուղղությամբ: Համարեք ինձ այն մարդկանցից մեկը, որն աջակցում և խրախուսում է «Օկուպացնենք Ուոլ սթրիթը» շաժումը»,- գրել է Գորն իր բլոգում:
Բացի այդ, Գորը տեղադրել է մի հղում, որով օգտատերերը կարող են հանգանակություն անել այս ակցիայի անցկացման համար: Հիշեցնենք, որ «օկուպանտների» բողոքի ակցիաները սկսվել են սեպտեմբերի կեսին և նպատակ ունեն բարձրաձայնելու ամերիկյան ֆինանսական համակարգի թերությունների մասին:
