Ռուսական Regnum լրատվական գործակալության փոխանցմամբ՝ Սիրիայի նախագահ Բաշար Ալ-Ասադի խորհրդական Բուսեյնա Շաաբանը լրագրողներին հայտարարել է, որ Թուրքիան պետք է դադարեցնի Սիրիայում հակամարտության բորբոքումը և զինված խմբավորումներին զենքի մատակարարումը.
«Թուրքիան փոխանակ աջակցի Սիրիայում ժողովրդավարության հաստատմանը, կոնֆլիկտ է բորբոքում երկրում։ Մենք Անկարային կոչ ենք անում անհապաղ դադարեցնել այդ գործողությունները։ Մի շարք երկրներ սպառազինում ու հովանավորում են Սիրիայում գտնվող զինված խմբավորումներին՝ դրանով իսկ նպաստելով երկրի մասնատմանը»։
Հիշեցնենք, որ ավելի վաղ նախագահ Ասադն էր հայտարարել, որ Թուրքիան զենք է մատակարարում սիրիացի ապստամբներին և վերջին շրջանում վերածվել է ԱՄՆ խոսնակի։ Ասադը նաև հայտարարել էր, որ Թուրքիան աջակցում է «Մուսուլման եղբայրներ» կազմակերպությանը, որը «սպառնալիք է ներկայացնում երկրի աշխարհիկ ռեժիմի համար»։
