Ադրբեջանական ANS PRESS-ի փոխանցմամբ՝ Nabucco գազատարով մատակարարումներ սկսելու ժամկետը հետաձգվել է մեկ տարով (այդ գազամուղը Ռուսաստանի տարածքի շրջանցման միջոցով պետք է Միջին Ասիայի ու Կովկասի գազային պաշարները հասցնի Եվրոպա)։ Այս մասին հայտարարել է Nabucco կոնսորցիումի կազմի մեջ մտնող OMV ընկերության գործադիր տնօրեն Գերհարդ Ռոյսը։
Վերջինս նշել է, որ Nabucco գազատարով առաջին գազամատակարարումները կսկսվեն 2018 թվականին։ Նախագիծը հերթական անգամ հետաձգվում է Nabucco գազատարի մատակարար երկրների հետ պայմանավորվածությունների բացակայության պատճառով, որոնք պետք է լիաբեռնեն գազատարը։
Խնդրի կարգավորման համար Ռոյսն այցելելու է Միջին Ասիա, ինչպես նաև հանդիպում է ունենալու Թուրքիայի էներգետիկայի ու բնական պաշարների նախարար Թաներ Յըլդըզի հետ։
Հիշեցնենք, որ ավելի վաղ նշվում էր, որ Nabucco գազատարի կառուցումը մեկնարկելու է 2013 թվականին, իսկ առաջին գազամատակարարումները՝ 2017 թվականին։
