Այսօր ՀՀ-ում ԱՄՆ դեսպանատանը տեղի ունեցավ ԱՄՆ հյուպատոս Ռոբերտ Ֆարքուհարի մամլո ասուլիսը:
Հյուպատոսը ներկայացրեց «Բազմազանության արտոնագիր» վիճակախաղի` Green card-ի 2013 թ. խաղարկության գրանցման գործընթացը, այնուհետև պատասխանեց լրագրողների հարցերին: Խաղարկությունը մեկնարկել է հոկտեմբերի 4-ից, և գրանցման ժամանակահատվածը կշարունակվի մինչև նոյեմբերի 5-ը:
Ռոբերտ Ֆարքուհարը նշեց, որ ամեն տարի խաղարկվում են շուրջ 50 000 մուտքի արտոնագրեր: «Այս ծրագրի ներքո Միացյալ Նահանգներ արտագաղթելու հնարավորություն են ստանում այն երկրների քաղաքացիները, որտեղից Միացյալ Նահանգներ արտագաղթը մեծ թիվ չի կազմում: Այս տարի, նախորդ տարվա համեմատությամբ, կատարվել են մի շարք փոփոխություններ»,- նշեց հյուպատոսը` մասնավորեցնելով, որ այսուհետև լուսանկարների խտությունը առնվազն 300 pixels պետք է լինի, մնացած պահանջները մնացել են նույնը:
«2012-2013 թվականների խաղարկության մասնակիցներն իրենց կարգավիճակը ստուգել կարող են բացառապես կայք այցելելով, այլ ոչ թե էլեկտրոնային փոստով: Դիմում ներկայացրածներից ոչ մեկին շահելու վերաբերյալ էլեկտրոնային փոստով ծանուցում չի ուղարկվելու, եթե նման հաղորդագրություն եք ստացել էլեկտրոնային փոստով` սա նշանակում է, որ հաղորդագրությունը ԱՄՆ պետքարտուղարությունից չէ և կեղծ է: Ձեր դիմումի կարգավիճակը արդեն կկարողանաք ստուգել 2012 թվականի մայիսի 1-ից սկսած»,- ասաց հյուպատոսը:
Ռոբերտ Ֆարքուհարը նշեց, որ ծրագրի ներքո ոչ թե Green card են շահում, այլ` հնարավորություն դիմել Green card-ի համար. «Խաղարկությունում շահելուց հետո անհրաժեշտ է, որպեսզի դուք անցնեք հարցազրույց և որպեսզի դուք համապատասխանեք արտոնագիր ստանալու պահանջներին: Ծրագրի պահանջները շատ հստակ են և պարզ` ծրագրին մասնակցելու համար անհրաժեշտ է ունենալ Միացյալ Նահանգների ավագ դպրոցի մակարդակի համապատասխանող կրթական մակարդակ և կատարել բոլոր այն պահանջները, որոնք անհրաժեշտ են ներգաղթային վիզայի համար:
Ուզում եմ նաև շեշտել, որ դիմումում պետք է նշվեն ձեր ընտանիքի բոլոր անդամները, ովքեր իրավասու են, այլապես ձեր դիմումը չի դիտարկվի: Յուրաքանչյուր մարդ պետք է ներկայացնի միայն մեկ դիմում, որովհետև համակարգը ստուգում է, և եթե նույն անունով մեկից ավելի դիմումներ են հայտնաբերվում, ապա դիմումներից և ոչ մեկը չի դիտարկվում: Դիմումում նշված տեղեկությունների համար դուք ինքներդ եք պատասխանատու` նույնիսկ այն պարագայում, եթե դիմումը ձեզ համար լրացնում է մեկ այլ անձնավորություն»:
Հյուպատոսը շեշտեց, որ, եթե կեղծ փաստաթղթեր ներկայացվեն, ապա իրենք տեղյակ են պահելու Հայաստանի իրավապահ մարմիններին, և նրանք հետամուտ կլինեն կեղծ փաստաթղթի ներկայացման հետ կապված քայլերին, և բացի այդ` կեղծ փաստաթղթի ներկայացման արդյունքում կարելի է հայտնվել այնպիսի իրավիճակում, որ այլևս երբեք Միացյալ Նահանգներ մուտքի արտոնագիր` ներգաղթի և ոչ ներգաղթի, չստանալ:
