Այսօր հրավիրված բանվեճի ընթացքում «Ժառանգության» ԱԺ պատգամավոր Անահիտ Բախշյանը նկատեց, որ ՕԵԿ-ը տպավորություն է ստեղծում, թե վեր է հանում իրականությունը, բայց երբ գալիս է քվեարկության պահը, քվեարկում են այնպես, ինչպես կոալիցիան: «Այսինքն` նրանց խոսքի և գործի մեջ հակասություն կա»,- ասաց Բախշյանը` օրինակ բերելով բյուջեի քվեարկությունը: Ինչին ի պատասխան` ՕԵԿ ԱԺ պատգամավոր Խաչիկ Հարությունյանն ասաց, թե մոռանում են, որ իրենք կոալիցիայի անդամ են` միաժամանակ նկատելով, որ նման բան չկա:
Անդրադառնալով երկխոսության առկախմանը` Անահիտ Բախշյանը նկատեց, որ թող իշխանությունը այդ հարցին պատասխանի, քանի որ ինքն ասելու բան չունի:
Խաչիկ Հարությունյանը` հիշեցնելով, թե ինչ ճանապարհով հասան երկխոսությանը, նշեց, որ իրենք պատրաստակամ են եղել շարունակել, հիմա էլ պատրաստ են երկխոսության, եթե ՀԱԿ-ը «քաղաքական կամք դրսևորի և գա հասնի կլոր սեղաններին, այլ ոչ թե հրապարակներում»:
Սակայն Անահիտ Բախշյանն ավելացրեց, որ դեռ 2008-ից` մարտյան դեպքերից հետո ինքն ասել է, որ ճիշտը երկխոսելն է: Հիշեցնելով այծերի օրինակը, որոնք կամրջի վրա միմյանց տեղ չեն տալիս, և երկուսն էլ ընկնում են: Բախշյանն ավելացրեց, որ դրանից կշահի երրորդը, բայց հրաժարվեց ասել, թե ով: Մեջբերելով Րաֆֆի Հովհաննիսյանի երեկվա հայտարարությունը, թե բոլորը պետք է հաղթահարեն միակը լինելու մոլուցքը և խոսելով ՀԱԿ-«Ժառանգություն» հավանական համագործակցության մասին` նա նշեց, որ իրենք երկխոսության կողմնակից են, բայց զարմանում է, որ այդ հարցը շարունակում են տալ:
Արձագանքելով լրագրողների այն հարցին, թե ժողովրդի կողմից կա երկու ուժերին միանալու պահանջ, նա նշեց, որ հնչում են նման կարծիքներ, բայց երբ Րաֆֆի Հովհաննիսյանը հացադուլ էր անում, բոլորը սպասում էին Լևոն Տեր-Պետրոսյանին, իսկ նա չեկավ:
Խոսելով Ռոբերտ Քոչարյանի վերադարձից` ՕԵԿ ԱԺ պատգամավոր Խաչիկ Հարութունյանը նշեց, որ դա նրա որոշելիքն է: Իսկ, եթե նախագահական ընտրություններում իր թեկնածությունը դնի, ապա իրենք ասել են, որ ՕԵԿ-ը սեփական թեկնածուով հանդես չի գալու և պաշտպանելուէ Սերժ Սարգսյանի թեկնածությունը:
Անահիտ Բախշյանը նկատեց, որ կարող է Քոչարյանը ցանկանա վերադառնալ, բայց շատ բան կարող է ուզենալ: Նա նաև նկատեց, որ կարող է ինչ-որ մի ուժ նրան «ուս հանդիսանա»: Խոսելով ուժերից` ընդգծեց ՀՅԴ, ՕԵԿ, ՀՀԿ, ԲՀԿ անունները:
Խոսելով խորհրդարանական ընտրություններում մրցակից ուժերից` Անահիտ Բախշյանը նշեց, որ իրենք կաշառք չեն բաժանելու և դրա հնարվորությունն էլ չունեն, և բոլոր քաղաքական ուժերին էլ մրցակից են համարում:
Իսկ Խաչիկ Հարությունյանի խոսքերով` իրենք ակնկալում են բոլոր շերտերի քվեները:
