Անդրադառնալով տարածաշրջանում տիրող քաղաքական վիճակին` «Նոր ժամանակներ» կուսակցության ղեկավար Արամ Կարապետյանն ասաց, որ այսօր սկսվում է պայքարն Անդրկովկասի համար: Այս պարագայում նա հատկանշական համարեց Ֆրանսիայի նախագահ Նիկոլա Սարկոզիի այցը տարածաշրջան, որն, ըստ նրա, ներառում է մի քանի հանգամանքներ` «տեսնել, թե ինչ վիճակ է Անդրկովկասում, Իրանի, Սիրիայի խնդիրը, դրան գումարած Թուրքիային Եվրամիություն չթողնելու հարցը»:
Նրա խոսքով` Հայաստանը Եվրամիություն տանող երկրի դերում հանդես է գալիս Ֆրանսիան: Ինչ վերաբերում է ներքաղաքական խնդիրներին, ապա, ըստ նրա, ամեն անգամ, երբ լճացած վիճակ է ստեղծվում, սկսվում է մեդալների շնորհման գործընթաց: Քանի որ Հայաստանում ներքին գործընթացները լճացած են, արտաքինը մնում է հայ-թուրքական սահմանի բացումն ու ղարաբաղյան հարցի լուծումը: Սերժ Սարգսյանը հոկտեմբերի20-ին կմասնակցի ԱՊՀ երկրների ոչ ֆորմալ հավաքին, որտեղ հարց կբարձրացնի մինչև նոյեմբերի վերջը եռակողմ հանդիպում կազմակերպելու մասին:
Անենակարևոր հանգամանքը, ըստ Կարապետյանի, այն է, որ «Նոր ժամանակներ»-ը եղել ու մնում է Եվրասիական միության շատ ջերմ ջատագովը:
Ըստ բանախոսի` անհասկանալի էր «Բարգավաճի» դիրքորոշումը, որ կոալիցիոն հուշագիրը ստորագրեց և ասում է, թե հետո կհայտնեն, թե ով է լինելու նախագահի իրենց թեկնածուն. «Անլրջության աստիճանը այնքան է հասել քաղաքական դաշտ»:
