«ԱՄՆ կառավարությունը հավանություն չի տա Կոնգրեսի առաջարկած «սև ցուցակին», որում նշված ռուսական քաղաքական գործիչներն առնչություն ունեն Սերգեյ Մագնիտսկու գործի հետ: Դրա փոխարեն՝ ԱՄՆ-ը չի տրամադրի մուտքի վիզա մարդու իրավունքները ոտնահարած անձանց»,- հայտարարել է ԱՄՆ պետքարտուղարի ժողովրդավարության, մարդու իրավունքների և աշխատանքի հարցերով փոխնախարար Մայքլ Պոզները: Այս մասին գրում է РИА Новости-ն:
Հիշեցնենք, որ Բրիտանական Hermitage Capital ընկերության իրավաբան Սերգեյ Մագնիտսկին մեղադրվում էր հարկերը չվճարելու մեջ: Նա մահացել է Մոսկվայի մեկուսարաններից մեկում՝ 2009 թվականի նոյեմբերին: Ամերիկայի սենատոր Բենջամին Քարդինը կազմել էր, այսպես կոչված, «Մագնիտսկու ցուցակ», որի մեջ մտել էին ռուսական քաղաքական գործիչներ, որոնք կապ ունեին այդ գործի հետ:
2011 թվականի ապրիլին ԱՄՆ կոնգրեսը առաջարկել էր օրենքի նախագիծ, որով նախատեսվում էր սանկցիաներ կիրառել և վիզա չտրամադրել այն մարդկանց, ովքեր կասկածվում են Մագնիտսկու մահվան հետ առնչություն ունենալու մեջ:
