«Եթե մարդիկ անհիմն հայտարարություն են անում` ասելով, որ այսքան ստորագրություն է հավաքվել այն դեպքում, որ մենք էլ տեղյակ չէինք, ապա ես չգիտեմ` նման հայտարարությունները ինչ նպատակ ունեն: Ուրիշի անունից խոսելը ի՞նչ է տալիս նրանց»,-երկուշաբթի Կապանում ասաց «Կապանի տարածաշրջանի զարգացման» հիմնադրամի տնօրեն Արմեն Փարսադանյանը` անդրադառնալով վերջերս «Էկոլոգիական անվտանգության ապահովմման և ժողովրդավարության զարգացման» ՀԿ-ի ներկայացուցչի մամուլի ասուլիսին: Նաև Արմեն Փարսադանյանը ասաց, որ պառակտում նախաձեռնողների միջև չկա. իրենք պատրաստ են համագործակցելու բոլորի հետ։ Իսկ ստորագրություններ` բաց նամակով ուղարկվեցին ՀՀ վարչապետին: Նոյեմբերի 11-ին Կապանում կազմակերպած հակաուրանյան հանրահավաքը և ստորագրահավաքի ընթացիկ արդյունքները վկայում են հանրության միակարծության մասին։ «Կառավարության կողմից ստորագրահավաքը անտեսելը Հայաստանի քաղաքացիները, ինչպես նաև միջազգային հանրությունը կասկածի տակ կդնեն մեր երկրում ժողովրդավարական և իրավական պետություն կառուցելու կառավարության ձգտումները»,- ասված է նամակում: Արդեն հավաքվել է 13850 ստորագրություն: Ըստ «Ազատամարտ» կոմիտեի նախագահ Խորեն Հարությունյանի` առաջիկայում երևի պայքարը այնքան էլ թեժ չի լինի։ Ամանորի նախօրեին չեն ուզում մարդկանց նախատոնական տրամադրությունը մթագնել։ Բայց սա չի նշանակում՝ հանգիստ նստել, ստորագրահավաքը շարունակվելու է, և սպասելու են վարչապետի պատասխանին։ Այս պահին Լեռնաձորում որոնողա-հետախուզական աշխատանքները շարունակվում են: «Չգիտեմ` որտեղից են որոշ կազմակերպություններ տարածում ուրանի հանքանյութի արդյունահանման մասին, բայց նման բան չկա: Սովորական աշխատանքներ են, ինչպես հորատում են մյուս լեռնհանքային կոմբինատները»,-ասաց Խ. Հարությունյանը` ավելացնելով, որ 3 օրը մեկ իրենք լինում են Լեռնաձորում: Լեռնաձոր գյուղի վերևի տարածքից հորատող նոր մեքենան տեղափոխել են Քաջարանի հիվանդանոցի մերձակա տարածք: Իսկ պայքարը ավարտած կհամարեն այն ժամանակ, երբ կառավարությունը կվերանայի իր որոշումը, այն է՝ կդադարեցնի որոնողա-հետախուզական աշխատանքները։