Ինչքան մոտենում է ձմեռային տրանսֆերային պատուհանի բացումը, այնքան շատանում են խոսակցությունները: Հատկապես շատ է խոսվում Բելգիայի և «Անդրլեխտ»-ի երիտասարդ հարձակվող Լուկակոյի մասին: Նրա ծառայություններով հետաքրքրված են «Ռեալ»-ը, «Լիվերպուլ»-ը, «Չելսի»-ն և «Մանչեսթր Սիթի»-ն: Բացի բելգիացի հարձակվողից` ուշադրության կենտրոնում են հայտնվել բազմաթիվ երիտասարդ ֆուտբոլիստներ, որոնց թվում է բրազիլացի հրաշամանուկ Նեյմարը, Լուկակոյի խաղընկեր Ազարը, «Վոլսբուրգ»-ի բոսնիացի հարձակվող Էդին Ջեկոն, Մոսկվայի «ԲԿՄԱ»-ի երկու ֆուտբոլիստներ` Իգոր Ակինֆեևը և Ալան Ձագոևը, «ՊՍՎ»-ի կիսապաշտպան Իբրահիմ Աֆելայը, որին արդեն «Բարսելոն» են «ուղարկել», Դորտմունդի «Բորուսիա»-ի և Թուրքիայի հավաքականի կիսապաշտպան Նուրի Շահիմը:
Այն բանից հետո, երբ «Ռեալ» տեղափոխվեց Գերմանիայի հավաքականի կիսապաշտպան Մեսութ Օզիլը, թիմի նորանշանակ մարզիչ Ժոզե Մաուրինյոն հայտարարել է, որ թիմի խաղը կառուցելու է Օզիլի շուրջ, իսկ դա նշանակում է, որ բրազիլացի հանրահայտ կիսապաշտպան Կական դժվար թե տեղ կգտնի խաղադաշտում «Ռեալ»-ի կազմում, և արդեն շատ է խոսվում, որ ձմռանը նա կլքի թիմը. նրան կարող է նաև հետևել Քարիմ Բենզիման, որը «Ռեալ» տեղափոխվելուց հետո այդպես էլ չկարողացավ ամրապնդվել թիմի հիմնական կազմում: