Հոկտեմբերի 11-ի մեծ ֆուտբոլային սպասումն ունեցավ տխուր վերջաբան: Հայաստանի ազգային հավաքականը Դուբլինում պարտվեց իռլանդացիներին և ենթախմբում մնալով երրորդ տեղում, զրկվեց Եվրո 2012-ի ուղեգրի համար հետագա պայքարից: Հայաստանի հավաքականը խաղի միջնամասում մնաց տասը հոգով` տուգանային հրապարակից դուրս ձեռքով խաղի համար կարմիր քարտ ստացավ մեր թիմի փորձառու ֆուտբոլիստներից մեկը` դարպասապա Ռոման Բերեզովսկին: Սակայն, ըստ ամենայնի մենք գործ ունենք ընդամենը մրցավարական սխալի հետ և ամենայն հավանականությամբ, իսպանացի մրցավար Գոնսալեզը և նրա եզրային օգնականը նախ չնկատեցին, որ իռլանդացի ֆուտբոլիստը ձեռքով էր կասեցրել գնդակն ու դուրս եկել դարպասապահին դեմ, և հետո կարծես թե սխալ նկատեցին Բերեզովսկու ձեռքը:
Բայց, ամեն ինչ արդեն անցյալում է և մրցավարական սխալներին հղում անելը ոչնչով չի փոխի իրավիճակը: 10 հոգով մնացած Հայաստանը պարտվեց և մնաց Եվրո 2012-ից դուրս: Բայց, Հայաստանի հավաքականն անգամ այդ դժվարին պայմաններում կարողացավ ֆուտբոլ խաղալ և դա է այն մեծ մխիթարությունը, որ կա այս ցավալի անհաջողությամբ հանդերձ: Հայաստանի հավաքականը չընկճվեց, չկորցրեց իրեն, չհուսահատվեց, այլ շարունակեց խաղալ և ավելի լավ խաղալ, քան 11 հոգով մնացած իռլանդացիները: Մենք իսկապես հիանալի հավաքական ունենք, և որքան էլ տարօրինակ չթվա, Իռլանդիայի հետ անհաջողության մատնված խաղը դրա վկայությունն է:
Հայաստանը պատվով խաղաց և խաղային որակով ոչնչով չզիջեց շատ ավելի փորձառու տանտերերին: Վարդան Մինասյանին հաջողվել է իսկապես որակյալ և հեռանկարային թիմ ձևավորել, որի խաղացողների բավական երիտասարդ միջին տարիքը հուշում է, որ այս թիմը կարող է ունենալ շատ լավ հեռանկար առաջիկա մի քանի տարիներին, երբ առավել կհասունանան և փորձ ձեռք կբերեն մեր հավաքականի երիտասարդները: Եվ դա թերևս նախընտրական այս մրցաշարի ամենակարևոր ձեռքբերումն էր, որ ունեցավ Հայաստանի հավաքականը, դրանով իսկ շատ լավ հիմք դնելով հետագա արդեն առավել առարկայական մրցաշարային հաջողությունների համար:
Շնորհակալություն Վարդան Մինասյանին, մարզչական կազմին և մեր ֆուտբոլիստներին այն հիանալի աշխատանքի համար, որ նրանք կատարեցին այս նախընտրական մրցաշարի ընթացքում: Անգամ առաջին հայացքից չգոհացնող արդյունքը աննախադեպ է Հայաստանի համար, բայց այն, որ մրցաշարի ընթացքում մեր բոլորի ակնկալիքները կտրուկ և բավական լրջորեն բարձրացան, հենց լավագույն վկայությունն է, որ այդ ամենի տակ իսկապես խաղ կար:
Այդ խաղը հիանալի հիմք է թիմը հաջորդ ընտրական մրցաշարին պատրաստելու համար: Իսկ մեր թիմի երիտասարդ մարզիչ Վարդան Մինասյանն ու երիտասարդ ֆուտբոլիստները ցույց տվեցին, որ կարողանում են աշխատել, կարողանում են պատրաստվել և այդ ամենն անում են նվիրումով և հաստատակամությամբ: Սա նաև հիանալի օրինակ է մեր կյանքի բոլոր ոլորտների համար, թե ինչ կարող է անել կամքը և աշխատանքը: Իսկ մենք անհամբերությամբ ենք սպասելու հաջորդ ընտրական մրցաշարին, ու թերևս աննախադեպ անհամբերությամբ, որովհետև մենք տեսել ենք, թե ինչ հավաքական ունենք: Կեցցե՛ք, տղաներ, դուք հրաշալի էիք:
