Խորհրդարանն իր հերթական քառօրյան սկսեց Մարտի 1-ի դեպքերն ուսումնասիրած ԱԺ ժամանակավոր հանձնաժողովի առաջարկությունների կատարման մոնիտորինգի զեկույցի քննարկմամբ: ԱԺ որոշմամբ, այդ մոնիտորինգն իրականցնում է ԱԺ պետաիրավական հարցերի մշտական հանձնաժողովը: Ընդ որում, նրանք պարտավոր են յուրաքանչյուր նստաշրջանին, այսինքն` 6 ամիսը մեկ անգամ զեկույց ներկայացնել, ինչը, սակայն, նախորդ անգամ նրանք այդպես էլ չարեցին: «Նախորդ զեկույցը չքննարկվեց ու թույլ տրվեց ԱԺ կանոնակարգ օրենքի և ԱԺ որոշման խախտում, սա խոսում է այն մասին, որ եթե քաղաքական մեծամասնությունը հնարավորություն ունենար, այս զեկույցն էլ չէր քննարկի»,- «Առաջին լրատվականի» հետ զրույցում տեսակետ հայտնեց մարտի 1-ի դեպքերն ուսումնասիրող ԱԺ նախկին ժամանակավոր հանձնաժողովի անդամ, ՀՅԴ-ական Արծվիկ Մինասյանը` հավելելով, որ հիմա իշխանություններն անում են ամեն ինչ, որպեսզի իրենց քննարկումները հետևանք չունենան: Պարոն Մինասյանը շեշտեց, որ իրենք գոհ չեն մարտի 1-ի դեպքերի բացահայտումից: