Հայաստանի հավաքականի հարձակվող Յուրա Մովսիսյանն անդրադարձել է այսօր Դուբլինում կայացող «Իռլանդիա-Հայաստան» հանդիպմանը. «Ես մաքսիմալիստ եմ։ Դաշտ դուրս գալով՝ ես միտված եմ միայն հաղթանակի։ Մակեդոնացիների հետ խաղում մեզ անհրաժեշտ էր 3 միավոր՝ ինտրիգը պահպանելու համար։ Աստծու օգնությամբ մենք կատարեցինք այդ առաջադրանքը։
Այժմ պետք է ընտրած ճանապարհով ընթանալ մինչև վերջ։ Այժմ մեզ նորից միայն հաղթանակ է անհրաժեշտ։ Մեր թիմն ընդհանրապես և անձամբ ես կանենք ամեն ինչ՝ դրան հասնելու համար։ Հավաքականը երբեք այսքան մոտ չի եղել խմբից դուրս գալուն։ Մենք կգործադրենք բոլոր ջանքերը՝ մեր ֆուտբոլի պատմության մեջ նոր էջ գրելու համար։ Թիմը մանրակրկիտ պատրաստվում է այս հանդիպմանը։ Հեշտ չի լինելու, սակայն անհնար ոչինչ չկա։
Որպես հարձակվող՝ ես ձգտում եմ կատարել իմ աշխատանքը՝ անկախ խաղի հաշվից. գոլեր խփել և օգնել իմ խաղընկերներին։ Մեր թիմում հավաքվել են այնպիսի տղաներ, ովքեր ճաշակել են հաղթանակի համը և անում են ամեն ինչ, որպեսզի ուրախություն պարգևեն հայ ժողովրդին։
Ընտրական մրցաշարում հեշտ հանդիպումներ չեն լինում։ Այո, խաղերն ավարտվում են տարբեր հաշիվներով, սակայն ամեն ինչ տեղի է ունենում այն մեծ աշխատանքի շնորհիվ, որը ֆուտբոլիստները կատարում են խաղադաշտում։ Երևանում ողջ մարզադաշտը մեզ հետ էր։ Դուբլինում մենք այդպիսի աջակցություն չունենք, փոխարենը մենք ունենք հավատ և մեծ ցանկություն»։