ԱԺ «Ժառանգություն» խմբակցության անդամ, ԵԽԽՎ հայաստանյան պատվիրակության անդամ Զարուհի Փոստանջյանը, «Առաջին լրատվականի» հետ զրույցում անդրադառնալով Եվրոպայի Խորհրդի «Հանուն ժողովրդավարության ապագայի» եռօրյա ֆորումի ընթացքում հնչած ելույթներին, որոնցում մատնանշվում էր Կառավարության ընդունելությունների տան դիմաց անցկացվող բողոքի ակցիան, նշեց. «Հայաստանում ժողովրդավարական ինստիտուտների կայացման հարցում հասարակական պահանջ կա, հասարակության պահանջը ոչ միայն այստեղ էր ներկայացված` ֆորումի մասնակիցների շարքում, այլ նաեւ ներկայացված էր դրսում` բողոքի ցույցի տեսքով: Հասարակության էներգիան, համենայն դեպս, փոխանցվել է ֆորումի մասնակցիներին, այդ թվում նաեւ՝ Պրեսկոտին, անկախ նրանից` ինքը ինչպես էր ձեւակերպում, ինչպես էր ներկայացնում ժողովրդավարության արժեքները: Ես անձամբ տեսա, թե ինչպես էին ԵԽԽՎ անդամները, այդ թվում եւ Մոնիտորինգի հանձնաժողովի անդամները մոտեցել ցուցարարներին, եւ երբ զրուցեցի նրանց հետ, նրանք բավական տպավորված էին, եւ նկատվում էր, որ հասարակության էներգիան փոխանցվել է նաեւ իրենց»:
