Թուրքական Dünya Bülteni կայքի փոխանցմամբ՝ Թուրքիայի վարչապետ Էրդողանը խիստ քննադատության է ենթարկել Ֆրանսիայի նախագահ Նիկոլա Սարկոզիին՝ Երևանում հնչեցրած այն հայտարարության համար, որ եթե Թուրքիան մինչև տարեվերջ չճանաչի Հայոց ցեղասպանությունը, ապա Ֆրանսիան կընդունի Հայոց ցեղասպանությունը ժխտումը քրեականացնող օրինագիծ։
Մոր մահվանից հետո Էրդողանն առաջին հրապարակավ ելույթն է ունեցել խորհրդարանական խմբակցության նիստում։ Էրդողանը Սարկոզիին հիշեցրել է Ռուանդան և Ալժիրը. «Այն, թե ինչ է տեղի ունեցել Ռուանդայում, աֆրիկացիները շատ լավ գիտեն։ Հայտնի է, թե արևմտյան որ երկրներն են միասին այն վերածել զուլումի։
Մինչդեռ ներկայումս մենք տեսնում ենք, որ նախընտրական նպատակով Հայաստան ժամանած Ֆրանսիայի նախագահն ինքն է խորհուրդներ տալիս Թուրքիային։ Նախ ինքնաքննադատությամբ զբաղվիր, ապա նոր խորհուրդ տուր ուրիշներին։ Ֆրանսիայում բնակվում է 600,000 հայ և 500,000 թուրք։ Սրանով Սարկոզին մեծ լարվածություն է մտցնում նրանց միջև»:
Հիշեցնենք, որ Էրդողանից առաջ Սարկոզիին քննադատել են Թուրքիայի արտգործնախարար Ահմեդ Դավութօղլուն և եվրոպական հարցերով պետնախարար, ԵՄ-ին Թուրքիայի անդամակցության գծով գլխավոր բանագնաց Էգեմեն Բաղըշը։