«ՀԱՊԿ անդամ երկրների համագործակցությունը շատ կարևոր է»,- այսօր Երևանում կայացած ՀԱՊԿ Արտակարգ իրավիճակները համակարգող խորհրդի 4-րդ նիստում հայտարարեց Բելառուսի ներկայացուցիչ Վլադիմիր Վաշենկոն:
Հայաստանի ԱԻ նախարար Արմեն Երիցյանն իր հերթին ավելացրեց, որ ԱՊՀ երկրների ճգնաժամային կառավարման կենտրոնների հետ Հայաստանի համագործակցությունը բարձր մակարդակի վրա է: «Երկիրն, ինչքան էլ հզոր լինի, աղետների առջև պետք է միասին պայքարել: Միաժամանակ` Հայաստանի ԱԻՆ փրկարարական ջոկատների աշխատակիցները ի վիճակի են կատարել իրենց մասնագիտական պարտականությունները»,- հավաստիացրեց նախարարը: Նա նաև տեղեկացրեց, որ Տավուշում տեղի ունեցած աղետի հետևանքները վերացնելու համար ՀԱՊԿ անդամ երկրներից օգնություն չեն խնդրել, քանի որ տեղի ուժերը լիովին բավարարար են: «Ես ասել եմ և ասում եմ, որ իմ կողքին նման տղաներ կան: Սողանքի գոտում անհետ կորածներին գտնելու համար նրանք անում են ամեն բան»,- ընդգծեց Արմեն Երիցյանը:
«Առաջին լրատվական»-ի հարցին ի պատասխան` նախարարը նշեց, որ սողանքի վայրում այս պահի դրությամբ շուրջ 180 փրկարար է աշխատում:
Նշենք, որ ՀԱՊԿ արտակարգ իրավիճակները համակարգող խորհրդի 4-րդ նիստին մասնակցում էին ՀԱՊԿ քարտուղարության, Հայաստանի, Ռուսաստանի, Բելառուսի, Ղազախստանի, Ղրղզստանի և Տաջիկստանի արտակարգ իրավիճակների նախարարությունների ղեկավարության ներկայացուցիչները:
Նիստի ընթացքում քննարկվեցին տեխնածին և բնական աղետների դեպքում հավաքական արձագանքման, միասնական տեղեկատվական հարթության ձևավորման, համատեղ ուսումնավարժությունների անցկացման, անդամ երկրներին մարդասիրական օգնություն ցուցաբերելու վերաբերյալ հարցեր:
Հիշեցնենք, որ ՀԱՊԿ-ը ռազմաքաղաքական միություն է, որը ստեղծվել է ԱՊՀ երկրների կողմից` 1992 թվականի մայիսի 15-ին: Կառույցի խնդիրն է` պաշտպանել միությանն անդամակցող երկրների տարածքը ցանկացած արտաքին ռազմաքաղաքական ագրեսորներից, իչպես նաև` աջակցել խոշոր աղետների դեպքում:
