Sky Sports-ի փոխանցմամբ՝ հոկտեմբերի 11-ին Դուբլինում կայանալիք «Իռլանդիա-Հայաստան» խաղի նախաշեմին Իռլանդիայի հավաքականի իտալացի գլխավոր մարզիչ Ջովաննի Տրապատոնին իր սաներին կոչ է արել օրինակ վերցնել «Մանչեսթեր Յունայթեդ»-ից.
«Ես զարմացած չեմ «Եվրո-2012»-ի ընտրական մրցաշարում Հայաստանի հավաքականի ելույթներից։ Բավական է նայել նրանց կազմին, հայ ֆուտբոլիստներից շատերը հանդես են գալիս ուժեղ առաջնություններում, մինչդեռ մեր ֆուտբոլիստներից շատերը խաղում են անգլիական երկրորդ դիվիզիոնին համարժեք ակումբներում։
Հայաստանի հետ խաղում հաջողության հասնելու համար մենք պետք է խաղանք հարյուր տոկոսանոց կենտրոնացվածությամբ՝ չթուլանալով ոչ մի վայրկյան։ Հայաստանի հավաքականը շատ և շատ ուժեղ է, նա խփել է ավելի շատ գնդակ, քան մենք։ Դրա համար էլ մենք պետք է չափազանց ուշադիր գործենք։
Ես արդեն իմ խաղացողներին հայտնել եմ, որ նրանք պետք է օրինակ վերցնեն «Մանչեսթեր Յունայթեդ»-ից։ Հասկանալի է, որ մենք չունենք այդ մակարդակի խաղացողներ, սակայն կարևոր է գործել խաղին մոտենալու պլանում անգլիական ակումբի գործելաոճով՝ հավասարակշռված։ Այդ դեպքում մենք կկարողանանք հաղթել, ինչը և ցանկանում ենք»։
