UEFA-ի պաշտոնական կայքը վաղը Դուբլինում կայացող «Իռլանդիա-Հայաստան» խաղի վերաբերյալ հայտնում է, որ նախկինում այդ հավաքականները երբեք չեն հանդիպել միմյանց՝ չհաշված 2010 թվականի սեպտեմբերի 3-ի երևանյան հանդիպումը, որում 14-րդ րոպեին Քեյթ Ֆահեյի հեղինակած միակ գոլի շնորհիվ հաղթանակ է տարել Իռլանդիայի հավաքականը։
Դրա հետ մեկտեղ, նշվում է, որ Հայաստանի ու Իռլանդիայի ակումբները (առավել ճշգրիտ չեմպիոնները) միմյանց հետ հանդիպել են երկու անգամ, և երկու դեպքում էլ դա տեղի է ունեցել Չեմիպիոնների լիգա/գավաթի շրջանակներում։
1974/75 մրցաշրջանում Չեմպիոնների գավաթի 2-րդ փուլում միմյանց հետ մրցել են Խորհրդային Միության (որի կազմում էր Հայաստանը) չեմպիոն Երևանի «Արարատ»-ը և Իռլանդիայի չեմպիոն «Քորք Սելթիկ»-ը։ Առաջին հանդիպումը տեղի է ունեցել 1974 թվականի հոկտեմբերի 23-ին Իռլանդիայում, որում «Արարատ»-ը կարողացել է 2։1 հաշվով արտագնա հաղթանակ տոնել (25-րդ րոպեին գոլի հեղինակ է դարձել Զանազանյանը, իսկ 65-րդ րոպեին՝ Ղազարյանը)։
Պատասխան հանդիպումը Երևանում կայացել է 1974 թվականի նոյեմբերի 6-ին։ Այս անգամ «Արարատ»-ին հաջողվել է 5։0 հաշվով ջախջախել իր մրցակցին (29-րդ ու 67-րդ րոպեներին դուբլի հեղինակ է դարձել Պողոսյանը, 54-րդ րոպեին գոլի հեղինակ է դարձել Զանազանյանը, 62-րդ րոպեին՝ Իշտոյանը, 74-րդ րոպեին՝ Անդրեասյանը)։
Այդպիսով, «Արարատ»-ին հաջողվել է երկու խաղերի արդյունքով 7։1 հաշվով ջախջախիչ առավելության հասնել իր մրցակցի նկատմամբ և դուրս գալ 1/4-րդ եզրափակիչ, որում նա երկու խաղերի արդյունքով (1։0, 0։2) զիջել է մրցաշարի ապագա հաղթող Մյունխենի «Բավարիա»-ին, ով, ի դեպ, ողջ մրցաշարում անցկացրած իր հանդիպումներում զիջել է միայն Արարատ»-ին՝ 1975 թվականի մարտի 19-ին Երևանում կայացած քառորդ երզափակիչ պատասխան հանդիպման ժամանակ (35-րդ րոպեին գոլի հեղինակ է դարձել Անդրեասյանը)։
Հայաստանի ու Իռլանդիայի ակումբային ֆուտբոլի երկրորդ դիմակայությունը գրանցվել է 2007/08 մրցաշրջանում, երբ Չեմպիոնների լիգային որակավորման առաջին փուլում մրցեցին Երևանի «Փյունիկ»-ը և իռլանդական «Դերրի Սիթին»: Իռլանդիայում տեղի ունեցած հանդիպումն ավարտվել է գոլազուրկ՝ 0։0 հաշվով, մինչդեռ Երևանում «Փյունիկ»-ը երկու անպատասխան գնդակ է ուղարկել իր մրցակցի դարպասը, և դուրս եկել որակավորման երկրորդ փուլ, որտեղ երկու խաղերի արդյունքով զիջել է Դոնեցկի «Շախտյոր»-ին (0։2, 1։2)։