«Ժողովրդական հեռուստատեսություն» հիմնադրամի հոգաբարձուների խորհրդի անդամ, Գյումրիի ժուռնալիստների «Ասպարեզ» ակումբի նախագահ Լևոն Բարսեղյանից «Առաջին լրատվականը» հետաքրքրվեց, թե արդյոք իրենք հարցումներ անցկացրե՞լ են` պարզելու, թե հանրությունն ինչպիսի հաղորդումների պահանջ ունի: Ըստ Լևոն Բարսեղյանի` բազմակարծություն արտահայտող հեռուստահաղորդումները Հայաստանում ճգնաժամի մեջ են կամ էլ մահանում են: «Հանրային կոչվող հեռուստատեսությունը հանրային չէ, այլ նախագահական հեռուստաալիք է` շուկայից ունենալով գովազդի ահռելի չափաբաժին: Այն, պետական բյուջեից ստանալով ահռելի գումարներ, չի սպասարկում հանրության կարիքները, այլ սպասարկում է իշխանություն ունեցողների և նրանց համակիրների կարիքները»,- ասաց նա: Լևոն Բարսեղյանը նշեց, որ իրենք հարցում են անցկացրել`նշելով. «Եթե Դուք ուզում եք ժողովրդական հեռուստաալիք ունենալ, բազմակարծություն ապահովող հաղորդաշարեր ունենալ, ապա պետք է դրամական փոխանցումներ իրականացնեք»: Նա տեղեկացրեց, որ մրցույթից հետո իրենք հարցումներ կանցկացնեն` իմանալու, թե ինչպիսի հաղորդումներ կամ հաղորդաշարեր են պահանջարկ վայելում: Դրա համար էլ, ըստ նրա, կմշակվեն հանգանակություն անելու մեխանիզմներ: «Կոկա-կոլայի ստեղծումից առաջ ոչ ոք չէր մտնում խանութ և հարցնում այդ մասին, ոչ ոք չգիտեր՝ առհասարակ կա՞ նման արտադրանք, թե՞ ոչ: Աշխարհում բազմակարծություն ապահովող հաղորդումների մեծ փորձ կա, մինչդեռ մեր ժողովուրդը դա չի տեսել: Եվ այդ է պատճառը, որ մեծամասնությունը չգիտի, թե ինչ հաղորդումներ է ուզում դիտել: Միայն քչերն են պատկերացնում, թե ինչ հաղորդումներ են ուզում դիտել: Կներկայացվեն հաղորդումների և հաղորդաշարերի նախագծեր, և մարդիկ էլ, ըստ այդմ, կորոշեն՝ գումար հանգանակո՞ւմ են տվյալ նախագծերի համար, թե՞ ոչ»,- ասաց նա: