«Ա1+» հեռուստաընկերության տնօրեն Մեսրոպ Մովսեսյանը մամուլի ասուլիսի ժամանակ նշեց, որ թեև «Ժողովրդական հեռուստատեսություն» հիմնադրամին փոխանցված 3,5 մլն դրամը սիմվոլիկ գումար է, սակայն գործընթացը շարունակվում է: Նա ասաց, որ, անկախ այն բանից` կհաղթի՞ «Ա1+»-ը, թե՞ ոչ, իրենք շարունակելու են եթերում լինել ինտերնետային հեռարձակմամբ: Երևանի մամուլի ակումբի նախագահ Բորիս Նավասարդյանն էլ վստահեցրեց, որ, եթե «Ա1+»-ին արտոնագիր չտրվի էլ, «Ժողովրդական հեռուստատեսության» հիմնադրամի հոգաբարձուների խորհուրդը շարունակելու է իր աշխատանքը: Գյումրիի «Ասպարեզ» մամուլի ակումբի նախագահ Լևոն Բարսեղյանն էլ հավաստիացրեց, որ Հեռուստատեսության և ռադիոյի ազգային հանձնաժողովի վրա կարող են ազդել միայն Բաղրամյան 26 հասցեում գտնվող ՀՀ նախագահի նստավայրից: Լևոն Բարսեղյանը հույս հայտնեց, որ այս անգամ որոշում կայացնողները ողջամիտ կգտնվեն «Ա1+»-ին եթեր տրամադրելու հարցում: Բորիս Նավասարդյանը ուշադրություն հրավիրեց այն հանգամանքի վրա, որ մի քանի հեռուստաընկերություններ գտնվում են նույն շենքում, օգտվում են նույն տեխնիկայից, և դժվար է որոշելը, թե որն է համարվում մրցակից: Բորիս Նավասարդյանը կանխատեսեց, որ ապագայում հեռուստատեսությունը Հայաստանում մահանալու է, որովհետև ինտերնետը նրան դուրս կմղի շուկայից: