News Georgia-ի փոխանցմամբ՝ Առևտրի համաշխարհային կազմակերպությանը (ԱՀԿ) Ռուսաստանի անդամակցության վերաբերյալ ռուս-վրացական բանակցությունների հերթական փուլն ավարտվել է անարդյունք։ Այս մասին հայտարարել է Վրաստանի փոխարտգործնախարար Սերգեյ Կապանաձեն, որը Շվեյցարիայում տեղի ունեցած բանակցությունների ժամանակ գլխավորել է վրացական պատվիրակությունը.
Կապանաձեն նշել է. «Բանակցություններն ավարտված են, և մենք կարող ենք ասել, որ դրանք տապալվել են, ավարտվել են անարդյունք։ ԱՀԿ-ին Ռուսաստանի անդամակցության վերաբերյալ Վրաստանը չի կարող տալ իր համաձայնությունն այնքան ժամանակ, քանի դեռ Ռուսաստանը չի փոխել օկուպացրած տարածքների (Աբխազիա և Հարավային Օսիա) ներսում առևտրի վերաբերյալ իր դիրքորոշումը»։
Ռուսական պատվիրակության ղեկավար Մաքսիմ Մեդվեդկովն իր հերթին նշել է, որ Վրաստանն իրենցից այնպիսի բան է խնդրում, որը չի մտնում ԱՀԿ-ի գործունեության ոլորտի մեջ։
Հիշեցնենք, որ Ռուսաստանը փորձում է ԱՀԿ-ին անդամակցել 1993 թվականից, ինչի վրա շարունակ վետո է դնում Վրաստանը։ 2008 թվականի օգոստոսին տեղի ունեցած ռուս-վրացական հնգօրյա պատերազմից հետո առաջին անգամ Ռուսաստանն ու Վրաստանն այս տարվա մարտի 10-ին Շվեյցարիայի Բեռն քաղաքում ԱՀԿ-ին Ռուսաստանի անդամակցության համար նստեցին բանակցությունների սեղանի շուրջը, դրանք, սակայն, ավարտվեցին անարդյունք։
Վրացական կողմը շարունակ առաջ է քաշում աբխազական և հարավօսական հատվածներում մաքսային անցակետերի օրինականացման հարցը։ Մինչդեռ ռուսական կողմն առաջարկում է այդ խնդիրը քննարկել ոչ թե իր, այլ Աբխազիայի և Հարավային Օսիայի հետ։
