«Ժողովրդական հեռուստատեսություն» հիմնադրամի հոգաբարձուների խորհրդի անդամ, Երևանի մամուլի ակումբի նախագահ Բորիս Նավասարդյանը մամուլի ասուլիսի ժամանակ տեղեկացրեց, որ Հայաստանի մարզերում ինտերնետի ոչ բավարար հասանելիության պատճառով հեռուստատեսությունը շատերի համար շարունակում է մնալ տեղեկատվության միակ աղբյուրը: Սրանից ելնելով էլ, ըստ Բորիս Նավասարդյանի, ծնվել է «Ժողովրդական հեռուստատեսության» գաղափարը, որը պետք է զբաղեցնի «Ա1+»-ի եթերի մի մասը: Բորիս Նավասարդյանն ասաց, որ այդ գաղափարը նորություն չէ աշխարհում: Տարբեր երկրներում, ըստ ԵՄԱ նախագահի, քաղաքացիները վճարում են ժողովրդական հեռուստաալիքի համար: Բորիս Նավասարդյանն ասաց, որ իրենց սկզբնական փուլում հետաքրքրում է ոչ թե այն, թե որքան կարող են վճարել քաղաքացիները, այլ թե որքանով է ընկալելի այդ գաղափարը, և որքանով է պատրաստ մեր հասարակությունը վճարել իր նախընտրած հեռուստաալիքի համար: Այն փաստը, որ մոտ քսան հազար քաղաքացիներ վճարել են ժողովրդական հեռուստատեսության համար, նա համարում է տպավորիչ: ԵՄԱ նախագահի դիտարկումներով` փոխանցումներ կատարած քաղաքացիների մեծամասնությունը չի պատկերացնում, թե բովանդակային առումով ինչպիսի հեռուստատեսություն է ուզում ունենալ, սակայն ողջունել է այդ գաղափարը: Սիմվոլիկ գումարների փոխանցումը նա պայմանավորում է այդ հանգամանքով: Սրանից զատ, նա նշեց, որ կան քաղաքացիներ, որոնք լավ էլ պատկերացնում են, թե ինչպիսի հեռուստատեսություն են ուզում, և նրանք փոխանցել են ավելի մեծ գումարներ:
