Ցավալի է, որ Ֆրանսիայի նախագահ Նիկոլա Սարկոզիի հայամետ բոլոր հայտարարությունները ընկալվում են որպես ներքին սպառման, այդ երկրում տեղի ունենալիք նախագահական ընտրությունների ժամանակ հայ համայնքի ձայները շահելու միտում: Այսօր տեղի ունեցած մամուլի ասուլիսի ժամանակ այս մասին հայտարարեց փորձագետ Մենուա Սողոմոնյանը:
«Սեփական շահերի հետապնդումն, իհարկե, չի կարելի բացառել, բայց իրականում Ֆրանսիայի քաղաքականությունն առավելապես ուղղված է Թուրքիային սթափեցնելուն: Դա է պատճառը, որ սխալ եմ համարում Ցեղասպանության ճանաչման հարցը միայն PR ակցիաների հետ կապելու սկզբունքը, սա պարզապես պետական կեցվածք է»,- համոզմունք հայտնեց փորձագետը:
Քաղաքագետ Սերգեյ Շաքարյանցն իր հերթին նկատեց, որ մեծ պետությունների շահերը մեր օրերում սկսել են ավելի սուր բախվել: «Այստեղ հայ-ֆրանսիական կամ Նիկոլա Սարկոզիի շահերը ոչ մի կապ չունեն այն ամենի հետ, ինչ տեղի է ունենում: Հօգուտ հայերի արված Սարկոզիի ոչ մի հայտարարություն չի կարող կանխորոշիչ լինել: Ֆրանսիացի ընտրողը վաղուց է կողմնորոշվել իր ընտրության հարցում: Սարկոզին այս անգամ ոչ մի նոր բան չասաց ո՛չ ղարաբաղյան հարցի, ո՛չ էլ Հայոց ցեղասպանության մասով: Այնպես որ, մեծ հաշվով, սա ապարդյուն այց էր: Նա ոչ մեկին ո՛չ հուսադրեց, ո՛չ վախեցրեց, որովհետև ի վիճակի չէ փոխելու Հարավային Կովկասում առկա իրավիճակը»,- նկատեց քաղաքագետը:
Շաքարյանցը համոզմունք հայտնեց, որ մինչև Ֆրանսիայում տեղի ունենալիք նախագահական ընտրությունները Սենատում Ցեղասպանության մասին բանաձևը չի անցնի:
