«Լավ ճանաչելով Պուտինին և ծանոթ լինելով նրա աշխատելաոճին, միանշանակ կարելի է ասել, որ այդ միությունը չի կարող ստեղծվել Եվրամիության նմանությամբ ու ժողովրդավարության հիմքերով, քանզի Պուտինի առաջարկած միությունում դոմինատ է լինելու Ռուսաստանը»,- «Առաջին լրատվականի» հետ զրույցում գնահատելով Պուտինի մտադրությունը՝ ստեղծել Եվրասիական միություն, կարծիք հայտնեց վրացի քաղաքական վերլուծաբան Պաատա Զաքարեաշվիլին:
Նա նկատեց, որ թեև ԵՄ-ում էլ կան դոմինանտներ, բայց այնտեղ դոմինանտը մեկը չէ, իսկ Պուտինի առաջարկած միությունում այդ դերը վերապահվելու է միայն Ռուսաստանին և գլխավոր լեզուն էլ է լինելու ռուսերենը. «Ես համաձայն եմ Սաակաշվիլիի հետ, որ դա կլինի ոչ թե Եվրամիության օրինակով մի տնտեսական, քաղաքական միություն, այլ Խորհրդային Միության կրկնօրինակը կլինի»:
Նշենք, որ Վրաստանի նախագահը գնահատելով Պուտինի առաջարկը, նշել էր, որ դա «ամենավայրի գաղափարն է» և նոր ԽՍՀՄ-ի ստեղծում է նշանակում:
Հարցին, թե ինչքանո՞վ է հավանական, որ Պուտինի առաջարկած Եվրասիական միությունը կարող է ստեղծվել, Զաքարեաշվիլին պատասխանեց. «Ես թերահավատ եմ, ամեն դեպքում եթե ստեղծվի էլ՝ չի լինի այն մասշտաբներով, ինչ ԽՍՀՄ-ը»:
Վերլուծաբանը նկատեց, որ եթե այդ միությունը ստեղծվի, ապա Հայաստանն ու Ադրբեջանը դրա մաս կկազմեն: Սակայն նա ընդգծեց, որ այդ միության կազմի մեջ լինելով՝ ղարաբաղյան հարցի կարգավորումը առաջընթաց չի ունենա, և այդ խնդիրը կազդի միության անվտանգության վրա:
