ՀՀ ժողովրդական դերասան Երվանդ Մանարյանը, ելույթ ունենալով ՀԱԿ հանրահավաքի ժամանակ, նշեց, որ իր համար միևնույն է, թե Ազատության հրապարակում քանի հոգի է հավաքված. «Որ ես այստեղ եմ՝ բավական է, կարծում եմ՝ նույնը դուք եք կարծում: Մի գդալ մերանը բավական է մեծ քանակությամբ կաթը մածուն դարձնելու համար, մեզանից յուրաքանչյուրը մերան է կաթի համար, մենք մեր արժեքը պետք է հասկանանք, մենք մեզ չենք կարողանում գնահատել, երբ մեր կողքին ափռ-ցփռ խոսում են շարժման հասցեին, երբեմն անհարմար ենք զգում պատասխանել, բայց պետք է կարողանանք շրջվել և թքել նրանց երեսին»:
Մանարյանը նշեց, որ Լևոն Տեր-Պետրոսյանի վերջին ելույթից հետո ինքը հասկացավ Դրոյի, Նժդեհի, Անդրանիկի արժեքը: Նա նշեց, որ Ազատության հրապարակում հավաքվածները նաև կարգավիճակ ստեղծողներ են, և հենց նրանք պետք է ասեն՝ ինչն ինչպես պիտի լինի:
Նա ժողովրդին ցուցադրեց լարախաղաց Վլադիմիր Հակոբյանի հեղինակած «20-րդ դարի հայ շրջիկ լարախաղացները» գիրքը և առաջարկեց Վլադիմիր Հակոբյանին շնորհել Հայաստանի ժողովրդական արտիստի կոչում. «Դա պետք է կատարվի հենց այստեղ, դա արտառոց բան չէ, 46թ. ես տեսել եմ, թե ինչպես ժողովրդական արտիստի կոչում շնորհեցին Գուրգեն Ավետյանին, 70-ականներին դերասան Զարեհ Տեր-Կարապետյանին դահլիճում հավաքված ընկերները ժողովրդական արտիստի կոչում շնորհեցին, այսօր ես առաջարկում եմ Վլադիմիր Հակոբյան լարախաղացին շնորհել ժողովրդական արտիստի կոչում: Սա ամենամեծ ֆորումն է և սրանից ավելի հեղինակավոր ֆորում լինել չի կարող, և այս մեծ ֆորումը ընդունեց իմ առաջարկը»:
Եզրափակելով իր ելույթը՝ Մանարյանը նշեց, որ ժողովուրդը չի պարտվելու և անպայման հաղթելու է. «Հաղթանակ, հաղթանակ, հաղթանակ»: