Ինչպես հաղորդում է The Guardian օրաթերթը, համաձայն WikiLeaks կայքի տարածած փաստաթղթերից մեկի՝ ԱՄՆ պետքարտուղար Հիլարի Քլինթոնը ՌԴ վարչապետին անվանել է «անդրկուլիսյան տիկնիկավար»: Պետքարտուղարն այս մասին խոսել է Ավստրալիայի վարչապետ Քևին Ռադայի հետ 2009 թ. մարտին կայացած հանդիպման ժամանակ, երբ ավստրալիացի վարչապետը խնդրել է անդրադառնալ նաև «ռուսական թեմաներին»:
Քլինթոնը միաժամանակ ավելացրել է, որ Պուտինը դժգոհ է իր այդ դերակատարությունից, քանի որ վարչապետի իրավասությունները սահմանափակված են լինելու միայն էներգետիկ ոլորտով, մինչդեռ մնացած իրավունքները Մեդվեդևինն են լինելու: Քլինթոնը վերջինիս անվանել է ավելի լիբերալ քաղաքական գործիչ, որը փորձում է ամրապնդվել Պուտինի կողքին: Քլինթոնն ու Ռադան խոսել են նաև Պակիստանի, Չինաստանի և Իրանի մասին: