Գերմանիայի նախագահ Քրիստիան Վուլֆը, ով երկօրյա այցով Թուրքիայում է, գովաբանել է հարեւանների հետ հարաբերությունները կարգավորելու ուղղությամբ Անկարայի կողմից վերջերս գործադրվող ջանքերը եւ հորդորել Թուրքիային ավելի շատ քայլեր կատարել` Հայաստանի հետ հարաբերությունները նորմալացնելու համար ։ Ինչպես հայտնում են միջազգային գործակալությունները` Թուրքիայի նախագահի հետ այսօրվա ասուլիսում նա ասել է, որ Գերմանիայում ներգաղթյալները պետք է վաղ հասակից գերմաներեն սովորեն եւ ինտեգրվեն հանրությանը։ Նրա այցի նախաշեմին` շաբաթ օրը, Գերմանիայի կանցլեր Անգելա Մերկելը հայտարարել էր, թե բազմամշակութայնությունը, իբրեւ հայեցակարգ, ձախողվել է Գերմանիայում։ Գերմանիայի նախագահի հետ համատեղ ասուլիսում Թուրքիայի նախագահ Աբդուլլահ Գյուլը Գերմանիայի քաղաքական գործիչներին կոչ է արել չշահարկել միգրանտների խնդիրները` նշելով, որ թուրքերին պետք է օգնել Գերմանիայի հանրությանը ավելի լավ ինտեգրվելու հարցում։