Երևանում բավական հագեցած օրակարգով ուղեկցելով Ֆրանսիայի նախագահ Նիկոլա Սարկոզիին, Սերժ Սարգսյանը ինչպես ասում են այդ խառը վիճակում չի մոռացել ՌԴ վարչապետ Վլադիմիր Պուտինի ծննդյան 59-ամյակը շնորհավորելու մասին: Ընդ որում, «մի ձեռքով» երկու ձմերուկ բռնելու այդ իրողության մեջ հետաքրքրականն այն է, որ օրինակ 2010 թվականին Սերժ Սարգսյանը «մոռացել» էր Պուտինին շնորհավորել, կամ էլ պարզապես նախագահականն էր մոռացել այդ մասին պաշտոնական հաղորդագրություն տարածել:
Բայց այդ դեպքում առավել ևս հետաքրքրական է, որ 2011 թվականին ոչ շնորհավորելն էին մոռացել, ոչ էլ այդ մասին պաշտոնական հաղորդագրություն տարածելը, այն դեպքում, երբ Սարկոզին «մոռանալու» թերևս իսկապես լուրջ առիթ էր: Բայց, մյուս կողմից, «չմոռանալու» պատճառը միգուցե հենց Սարկոզին էր:
Բանն այն է, որ Սերժ Սարգսյանը վերջին երկու շաբաթների ընթացքում պաշտոնական այց է կատարում Ֆրանսիա, իսկ հետո էլ պետական այցով այստեղ հյուրընկալում Ֆրանսիայի նախագահին: Այդ ինտենսիվ շփումը անկասկած կարող էր առաջացնել Ռուսաստանի իշխանության հետաքրքրությունը, ինչը նման դեպքերում կարող է արտահայտվել բավական կոշտ արձագանքի ձևով: Իսկ ինչպես հայտնի է, Սերժ Սարգսյանը հոկտեմբերին պատրաստվում է մեկնել Մոսկվա, հետևաբար պետք է անի այնպես, որ Մոսկվայում իրեն զայրացած չսպասեն:
Իսկ Ռուսաստանի իշխանությունը, ինչպես պարզվեց, իրականում ՌԴ վարչապետն է, ոչ թե նախագահը: Ու ահա այդ պատճառով էլ Հայաստանի նախագահը շնորհավորել է ՌԴ վարչապետին: Բայց, այստեղ իհարկե մեկ այլ ուշագրավ բան էլ կա, Սարկոզիի այցից բացի: Բանն այն է, որ Հայաստանում այժմ ընթանում է ընդդիմության շուրջօրյա հանրահավաքը, որը կարող է դեռ երկար շարունակվել:
Ըստ երևույթին Սերժ Սարգսյանին այստեղ Պուտինի աջակցությունն է պետք, ինչպես պետք էր եղել 2008 թվականի նախագահական ընտրությանը, ինչը ստանալու համար Սերժ Սարգսյանը մարտի 1-ից հետո Մոսկվա մեկնեց և շնորհակալություն հայտնեց ՌԴ այն ժամանակվա նախագահ Պուտինից: Արդյոք Սերժ Սարգսյանն այժմ էլ չի փորձում ստանալ Պուտինի աջակցությունը այն դեպքի համար, երբ ընդդիմության շուրջօրյա հանրահավաքները վերածվեն իսկապես լուրջ զանգվածի մոբիլիցազիա ապահովող մի գործընթացի, երբ իշխանությունն այլևս որևէ միջոցով, անգամ ճանապարհները փակելով և մարդկանց ահաբեկելով չի կարողանա դիմագրավել այդ մոբիլիզացիային: Ընդհանուր առմամբ առայժմ շուրջօրյա հանրահավաքները իհարկե այդպիսի հեռանկար այդքան էլ չեն ենթադրում, գոնե մինչ այս պահը, բայց Սերժ Սարգսյանը երևի թե մտածում է, որ «երկաթը տաք-տաք» պետք է ծեծել, ու երևի թե նախընտրում է արդեն այժմվանից պայմանավորվել Պուտինի հետ: