ԼՂՀ նախկին արտգործնախարար Արման Մելիքյանը ՀԱԿ-«Ժառանգություն» համագործակցությունն ու միավորումը քիչ հավանական է համարում:
Անդրադառնալով «Ժառանգության» առաջնորդ Րաֆֆի Հովհաննիսյանի այցին Ազատության հրապարակ և այն հանգամանքին, որ երբ վերջինս էր հացադուլ անում Տեր-Պետրոսյանը չբարևեց նրան, Մելիքյանը նկատեց. «Ամեն մեկն իր համար է որոշում կայացնում, սա միջանձնային, մարդկային հարաբերությունների խնդիր է, և որոշակի կենսափիլիսոփայության դրսևորում: Դա կարող է ընկալվել նաև այնպես, որ պարոն Հովհաննիսյանը քաղաքավարության դաս տվեց պարոն Տեր-Պետրոսյանին»:
Այդուամենայնիվ, ըստ Մելիքյանի, այդ բարևել-չբարևելու հանգամանքը պետք է դուրս թողնել քննարկման շրջանակից, քանզի դրանք, բացի զուտ մարդկային գործողություններից, ունեն նաև քաղաքական շեշտադրումներ. «Իհարկե պարոն Հովհաննիսյանը, քաղաքական առումով թերևս շահեց այդ այցելությամ»:
Մեկ այլ ասուլիսի բանախոս, ԱԺ պատգամավոր Վարդան Խաչատրյանը ևս, պատասխանելով վերոնշյալ հարցին, ասաց, որ Հովհաննիսյանի այցը քաղաքավարության ժեստ էր և ուրիշ ոչինչ ավելին. «Սա ժեստ էր, որն անհրաժեշտ էր անել, իբրև ընդդիմությունը ընդդիմությանը»: