«Ռոբերտ Քոչարյանը բարոյական իրավունք ունի վերադառնալ քաղաքականություն: Եթե իշխանության վերադարձավ հրաժարականի պահին փախուստի դիմած Լևոն Տեր-Պետրոսյանը, ինչո՞ւ չի կարող վերադառնալ Քոչարյանը. չէ՞ որ նա երբեք ոչ մի բանից չի փախել»- այսօր լրագրողների հետ հանդիպման ժամանակ նման տեսակետ հայտնեց «Ազգային համաձայնություն» կուսակցության նախագահ Արամ Հարությունյանը:
Նրա խոսքով` Քոչարյանը վերադառնալու լուրջ պոտենցիալ ունի, և իրեն շատ հետաքրքիր կլինի ականատես լինել Հայաստանի երկրորդ նախագահի` քաղաքականության մեջ լինելը, մանավանդ որ «Քոչարյանը երկու նախագահներից վատ շախմատ չի խաղում և վերադառնալու ճիշտ ճանապարհ կգտնի»:
«Խոսում են Մարտի 1-ի մասին, բայց նույն ՀԱԿ առաջնորդ Լևոն Տեր-Պետրոսյանն էր, ով ցինիկություն արեց` հայտարարելով, որ այդ գիշեր շատ էլ հանգիստ է քնել: Նա էր, որ ասում էր` եթե այդ օրերին գոնե մեկ զոհ լինի, այդ մեկն ինքը պիտի լինի, բայց Մարտի 1-ի զոհերի ցուցակում այդպես էլ Լևոն Տեր-Պետրոսյանի անունը չեղավ»,- նկատեց Հարությունյանը:
«Առաջին լրատվական»-ի թղթակցի խնդրանքով, անդրադառնալով ԵԽԽՎ-ում ընդունված Մարտի 1-ի էջը փակող բանաձևի ընդունման փաստին, կուսակցության ղեկավարն ասաց. «Եվրոպայի մահակն այս հարցում իր դերը արդեն կատարել է, և այս կերպ փորձ է արվում սիրաշահել հայաստանյան իշխանություններին»:
Ամփոփելով` Արամ Հարությունյանը հայտարարեց, որ պատրաստ է գնալ և ելույթ ունենալ ՀԱԿ շուրջօրյա հանրահավաքներին, սակայն դա նրան անել թույլ չեն տալիս:
«Երկու անգամ արդեն իսկ հարթակից հանդես գալու ձայն եմ խնդրել, սակայն ՀԱԿ-ից ինձ ասել են, որ իմ ելույթը իրենց հարթակից նպատակահարմար չեն համարում: Հո չե՞մ գնալու կոնյակ-բոնբոներկայով Նիկոլ Փաշինյանից կրկին ձայն խնդրեմ»,- նկատեց Արամ Հարությունյանը: