«Ես անհավանական եմ համարում պարոն Քոչարյանի վերադարձը, բացի իրենից այդ վերադարձը ոչ մեկի կողմից պահանջված չէ»,- անդրադառնալով Ռոբերտ Քոչարյանի հնարավոր վերադարձի մասին խոսակցություններին` լրագրողների հետ հանդիպման ժամանակ կարծիք հայտնեց ԼՂՀ նախկին արտգործնախարար Արման Մելիքյանը:
Նա նաև նկատեց, որ անգամ, Քոչարյանի համար այդ վերադարձը պահանջված չէ, քանզի մարտավարական առումով` իր համար շահավետ է, որ Սերժ Սարգսյանն ավարտի իր առաջին և գուցե երկրորդ պաշտոնավարումը:
Ըստ բանախոսի` առանց այն էլ Քոչարյանի ազդեցությունը մեծ է հայաստանյան ներքաղաքական զարգացումների վրա, և նրա կողմից դրսևորած ավելի մեծ ճնշումը ռիսկային կլինի հենց Քոչարյանի համար. «Հենց առաջադրումը նրա համար բավական ռիսկային կլինի, բայց առաջադրվելու դեպքում էլ նա չի ընտրվի»:
Մելիքյանը հավելեց, որ Ռոբերտ Քոչարյանի վերադարձը պահանջված չէ նաև արտաքին ուժերի կողմից, քանզի արտաքին ուժային կենտրոններից և ոչ մեկին ձեռնտու չէ Հայաստանում հենարան ունենալ այնպիսի մի մարդու, ով կապ ունի Մարտի 1-ի իրադարձությունների հետ:
Նա նաև բացառեց ռուսական սցենարի կիրառումը Հայաստանում:
Խոսելով առաջիկա ընտրություններում իր մասնակցության մասին` Արման Մելիքյանը նշեց, որ դեռևս մտածում է խորհրդարանական ընտրություններում իր մասնակցության ձևաչափի մասին և դեռևս կայացված որոշում չկա, իսկ որոշումը կկայացվի, եթե հստակ լինի, որ առաջիկա ընտրություններն իրապես արդար կլինեն. «Նախագահական ընտրություններին իմ մասնակցությունն առավել հավանական եմ համարում, քան խորհրդարանականին: Ընտրություններին մասնակցությունն ինձ համար երբևէ ինքնանպատակ չի եղել, իսկ խորհրդարանական ընտրություններում, եթե լինի մի ուժ, ում գաղափարներն ինձ հարազատ լինեն, հնարավոր է` ես որպես աջակից լինեմ»,- պարզաբանեց Մելիքյանը և հավելեց, որ ինքը որոշում կկայացի նոյեմբերին, և առավել հավանական է մեծամասնական ընտրակարգով մասնակցի խորհրդարանական ընտրություններին:
Մելիքյանը նաև կանխատեսումներ արեց, թե որ կուսակցությունները կհայտնվեն ապագա խորհրդարանում: Նրա կարծիքով` եթե ներկայիս քաղաքական իրավիճակը պահպանվի, ապա խորհրդարանում կլինեն ՀՀԿ-ն, ԲՀԿ-ն, ՀԱԿ-ը և ՀՅԴ-ն: Հարցին, թե ՕԵԿ-ին և «Ժառանգությանը» չի՞ տեսնում խորհրդարանում, Մելիքյանը պատասխանեց. «ՕԵԿ-ը, եթե անցնի էլ, չեմ տեսնում, իսկ եթե մնա այն տրամաբանությունը, որը կա, ապա հնարավոր է նաև «Ժառանգությունը» փոխարինվի ՀԱԿ-ով»:
Ըստ Մելիքյանի` նախընտրական զարգացումների գագաթնակետը լինելու է փետրվար-մարտ ամիսներին բայց այն ժամանակ չի լինի եռաբևեռացվածություն, ինչպես այժմ է` Տեր-Պետրոսյան-Ս. Սարգսյան-Ռ. Քոչարյան, այլ կլինի երկբևեռություն, որովհետև բևեռներից երկուսը կմիավորվեն. «Մինչ այդ Սերժ Սարգսյանը կընտրի, թե ում հետ կհամագործակցի, ես հավանական եմ համարում, որ նա կգերադասի համագործակցել Քոչարյանի հետ, բայց իր առաջադրած պայմաններով»:
Այս բևեռների միավորման հարցում, ըստ Մելիքյանի, մեկ հանգամանք ևս կա, մասմնավորապես, նրա գնահատմամբ, Ռուսաստանը չի ցանկանա Տեր-Պետրոսյանի ծանրակշիռ վերադարձը խորհրդարան կամ նախագահի պաշտոնում, և այդ առումով Ս. Սարգսյանը և Ռ. Քոչարյանը կունենան ռուսական աջակցություն` ընդդեմ Տեր-Պետրոսյանի:
Ինչ վերաբերում է Արևմուտքին, ապա ըստ Մելիքյանի, դատելով Արևմուտքի այսօրվա դիրքորոշումից, և թե ինչպես են այնտեղ գնահատում Մարտի 1-ի իրադարձությունները, ապա Քոչարյան-Սարգսյան տանդեմը նրանց ևս կգոհացնի:
