ՀՀԿ ԱԺ խմբացության ղեկավար Գալուստ Սահակյանը լրագրողների խնդրանքով, անդրադառնալով Լևոն Տեր-Պետրոսյանի այն ելույթին, որտեղ խոսել էր նժդեհյան գաղափարախոսությունից, նշեց, որ միտինգ են արել, որ հայհոյեն մեզ, իսկ մենք ինչ որ պետքն է` ասել ենք: Իսկ երբ խնդրեցին մասնավորեցնել, ասաց, որ սովորաբար գրողը չի կարողանում իր գրածը նույնությամբ արտասանել, և առաջարկեց թերթերը կարդալ:
Ամեն դեպքում լրագրողները, ևս մեկ անգամ մեջբերելով Լևոն Տեր-Պետրոսյանի այն հայտարարությունը, որ ՀՀԿ-ն ֆաշիստական տարրեր է պարունակում, ասաց. «Դուք գիտեք, որ ես հզոր պատասխաններ տվող եմ, բայց բաներ կան, որ չի կարելի անդրադառնալ: էդուարդ Շարմազանովը այդ հարցին պատասխանել է»:
Լրագրողները, նկատելով, որ Գալուստ Սահակյանը հայտնի է իր կանխատեսումներով, հետաքրքրվեցին, թե ստեղծված իրավիճակին ի՞նչ կհաջորդի, ինչին ի պատասխան` նա ասաց. «Հերթական ընտրությունները»:
Իսկ այն հարցին, թե երկխոսությունն իրեն ամբողջությամբ սպառե՞լ է, ավելացրեց. «Ես չեմ կարծում, որ միտինգներում այն հայհոյանքերը, որը որդեգրել են` երկխոսության ընթացքում դրական արդյունք կտան: Ընդդիմությունը պետք է որոշի, թե ինչ ճանապարհով է ցանկանում գնալ»:
