«Հայաստանի երկրորդ նախագահ Ռոբերտ Քոչարյանը քաղաքականություն կարող է վերադառնալ ինչպես «Բարգավաճ Հայաստան» կուսակցության, այնպես էլ որևէ նախընտրական դաշինքի համամասնական ցուցակները գլխավորելու միջոցով»,- «Առաջին լրատվական»-ի հետ զրույցում ասաց քաղտեխնոլոգ Արմեն Բադալյանը` տեսականորեն հավասարապես հնարավոր համարելով երկու տարբերակն էլ:
«Սակայն մեծ հարց է` կցանկանա՞ ԲՀԿ-ն, որ Քոչարյանը գլխավորի իր ցուցակը: Գոնե ես նման բան ցանկանալու պատճառ չեմ տեսնում: Հայաստանի երկրորդ նախագահին թույլ տալով գլխավորել իր համամասնական ցուցակը` ԲՀԿ-ն նախ` իր վրա կվերցնի Մարտի 1-ի դեպքերի պատասխանատվությունը, 10 զոհերի արյան մեղքը: Քոչարյանի` նախընտրական դաշինքների համամասնական ցուցակները գլխավորելը ևս վտանգավոր է նույն այդ կուսակցությունների ղեկավարների և անդամների համար, ովքեր պետք է լավ գիտակցեն, որ նման քայլով իրենց վրա են ուղղորդելու իշխանությունների հարվածները: Ի վերջո, Ռոբերտ Քոչարյանը վերցնելու բան ունի ոչ թե ընդդիմությունից, այլ միայն Սերժ Սարգսյանից»,- նկատեց Արմեն Բադալյանը:
Ամփոփելով` քաղտեխնոլոգը նկատեց, որ քաղաքականություն վերադառնալու Ռոբերտ Քոչարյանի տարբերակներից հաջորդը կարող է լինել նրա կողմից ձևականորեն որևէ կուսակցության հիմնադրումը և դրա առաջնորդի դերի ստանձնումը:
Հիշեցնենք, որ «168 ժամ»-ն այսօրվա իր համարում գրել էր. «Որոշ տեղեկությունների համաձայն՝ ՀՀ երկրորդ նախագահ Ռոբերտ Քոչարյանին սատարող ուժերի շրջանակում քննարկվում են առաջիկայում նրա՝ ակտիվ քաղաքականություն վերադառնալու մի քանի տարբերակներ:
Նախ` Ռ. Քոչարյանը կարող է գլխավորել իրեն սատարող որևէ կուսակցության համամասնական ցուցակը: Տվյալ դեպքում այդ կուսակցությունը կարող է լինել «Բարգավաճ Հայաստանը», երկրորդ տարբերակի դեպքում նա, հնարավոր է, գլխավորի որևէ նախընտրական դաշինքի համամասնական ցուցակ: Այս դեպքում արդեն հավանական է համարվում ԲՀԿ-ի, ՀՅԴ-ի, Գուրգեն Արսենյանի գլխավորած ՄԱԿ-ի և այլ կուսակցությունների դաշինքը»,- գրում է թերթը, ապա հավելում.
«Հիշեցնենք, որ Գ. Արսենյանը նույնպես ակնարկել է խորհրդարանական ընտրություններին մասնակցելու մասին: Եվ երրորդ տարբերակն այն է, որ Ռ. Քոչարյանը անմիջականորեն չի մասնակցի խորհրդարանական ընտրություններին, այլ անուղղակիորեն կղեկավարի իրեն սատարող ուժերի մասնակցությունը: Քաղաքական կուլիսներում շրջանառվող խոսակցությունների համաձայն՝ 2013 թ. նախագահական ընտրությունների ելքը, այդ թվում՝ և դրան Ռ. Քոչարյանի մասնակցության հնարավորությունը, որոշվելու է առաջիկա խորհրդարանական ընտրությունների արդյունքով: Եթե երկրորդ նախագահին սատարող ուժերը կարողանան հաջորդ խորհրդարանում գգալի տեղեր ապահովել, ապա Ռ. Քոչարյանը նախագահական ընտրություններում կառաջադրվի»:
