«Արտահերթ ընտրություններ Հայաստանում միանշանակորեն չեն լինելու, իսկ ՀԱԿ-ի հանրահավաքները ոչ այլ ինչ են, եթե ոչ` դեկորացիա, նրա գործունեությունը` շախմատային պարտիայում կատարված հետքայլ»,- այսօր տեղի ունեցած մամուլի ասուլիսի ժամանակ այս մասին հայտարարեց «Ազգային համաձայնություն» կուսակցության ղեկավար Արամ Հարությունյանը:
«Շախմատի առաջին պարտիան ավարտվեց ՀԱԿ-ի պարտությամբ, ժողովուրդը երկխոսությունից ոչինչ էլ չշահեց»,- նկատեց քաղաքական գործիչը: Հարությունյանի խոսքով` Լևոն Տեր-Պետրոսյանը ցանկանում է ցույց տալ որ ինքն է միակ ընդդիմությունը:
«Իշխանությունները ևս դժվար իրավիճակում են: «Հանրապետական» կուսակցության վիճակն անմխիթար է, նախագահը նստած է ջարդված ոտքով աթոռին, իսկ այդ ջարդված ոտքը հենց վարչապետ Տիգրան Սարգսյանն է: Եթե իշխանությունը ընտրությունների է գնալու` իրենց ցուցակում ունենալով նման վարչապետի, ապա միանշանակ է, որ Տիգրան Սարգսյանի գնալուց հետո մյուս վարչապետը ավերակների վրա է գալու»,- ասաց Հարությունյանը:
Քաղաքագետի խոսքով` նախընտրական շրջանում բավական բարենպաստ դիրքերում է «Բարգավաճ Հայաստան» կուսակցությունը: «Իսկ ահա «Ժառանգությունը» չօգտվեց իրեն ընձեռված հնարավորությունից: ՀՅԴ-ն ևս չօգտվեց բաց դաշտից` դառնալու սոցիալիստական ուժերի մերանը: ՀԱԿ-ում, ցուցակի հետ կապված, տարաձայնություններ են առաջանալու: Խորհրդարանում նրանց տրվելիք տեղերը հաստատ ավելի քիչ են լինելու, քան այնտեղ գտնվող մարդկանց ախորժակն է: Այլակարծությունն այնտեղ տեղ չուն, և Տեր-Պետրոսյանի կարծիքից տարբեր կարծիք արտահայտողները կհամարվեն ՀԱԿ-ի թշնամի»,- համոզմունք հայտնեց Հարությունյանը:
Ամփոփելով` նա տեղեկացրեց, որ կուսակցությունը դաշինք կազմելու բանակցությունների մեջ է` ինչ-ինչ ուժերի հետ, և անպայման մասնակցելու է գալիք խորհրդարանական ընտրություններին:
