«Հանրապետություն» կուսակցության նախագահ Արամ Սարգսյանն էլ իր ելույթում նշեց, որ սրտանց ուզում է, որ Հայաստանի հավաքականը հաղթի վաղվա խաղում: Նա հիշեց Բրազիլիայի հավաքականի մարզիչներից մեկի խոսքը, որն ասել է. «Թեև ֆուտբոլը խաղում են ոտքով, բայց դրա համար գլուխ է պետք»:
Սարգսյանը նկատեց, որ ինքը համոզված է, որ հայ ժողովուրդը «գլխով» ժողովուրդ է՝ որոշ բացառություններով. «Օրինակ՝ մեր իշխանավորներից մեկը, որը ծնունդով իմ երկրացի է, ասել է, թե քաղաքականության համար խելք պետք չի: Եկեք այդ ինքնախոստովանությունն անկեղծ ընդունենք, ի վերջո ՀՀԿ-ն իր գոյությամբ, ապացուցում է, որ իրենց խելք պետք չի»:
Սարգսյանը նշեց, որ այստեղ կիրառելի է՝ «Ուժ ունես, խելք պետք չէ» ասացվածքը, և ՀՀԿ-ն ՀԱԿ-ի հետ հենց այդպես է խոսում ասելով՝ «քանդեք վրանները», «իշխանությունը վերցրել ենք, չենք տալու», «ժողովրդին կցրենք», «արտագաղթ չկա», ու եթե ինչ-որ մեկը հակառակ բան է ասում, նրանք թվեր են գրում և ուժով հակադրվում:
Սարգսյանն անդրադարձավ Շառլ Ազնավուրի այն արտահայտությանը, թե Հայաստանը դատարկվում է ու դատարկվում է մի քանի մաֆիոզների պատճառով. «Հիմա թող այս իշխանությունները Շառլ Ազնավուրին պատասխանեն, ասեն, որ այդպես չէ, թե՞ իրենք Ազնավուրին կարող են մեղադրել, որ քաղաքական նպատակներով է նման բան ասել»:
«Հանրապետություն» կուսակցության առաջնորդը ընդգծեց, որ նման իրավիճակն այս իշխանությունները չեն կարող շարունակել, հասել է նրանց իշխանության վերջը. «Մեր այս գործողությունները օր առ օր մոտեցնում են այս իշխանության փլուզմանը»:
Արամ Սարգսյանը նշեց, որ հպարտանում և սիրում է հայ ժողովրդին, քանզի Ռուսաստանում, որտեղ 160 մլն մարդ է ապրում նախագահը վարչապետին պաշտոն է «պաս» տալիս, բայց փողոց է դուրս գալիս երկու անգամ քիչ մարդ, քան Ազատության հրապարակի վրաններում քնում են գիշերները. «Մեր ժողովուրդը ոգի ունի, մեր ժողովուրդն ազատատենչ է, մեր ժողովուրդն ապագա ունի, մեր այս քայլերը հանգրվան են հաղթանակի»: