«4 կգ 300 գրամ, ամեն օր բերում են»,- նման խոսքերով սկսեց իր ելույթը ՀՀՇ վարչության նախագահ Արամ Մանուկյանը՝ կրկին անդրադառնալով ՀՀՇ-ին հանձնվող ՀՀԿ անդամատոմսերին:
Մանուկյանը նշեց, որ վերջին օրերին իշխանությունների դրսևորած վարքագիծը խոսում է նրանց անգրագիտության մասին. «8 օր Երևանը բլոկադայի են ենթարկել, գիժ են սրանք, ամոթ է, ՀԱԿ լոգոն 10 տպարանում չեն տպել, ՀԱԿ-ի հետ կապված որևէ գործարք չեն անում, միայն տգետը, միայն չարչին կարող է նման բան ասել»:
Մանուկյանը նշեց, որ այս իշխանությունների մոտ ամեն ինչ խառնված է, ոչ մի բան իր տեղում չէ. «Սրանց մոտ ատամի ու կոշիկի խոզանակը նույնն ա, Լֆիկից լավ ալյուր ծախող կստացվեր, Մկից լավ զապրավչիկ, բայց որ այդ մարդիկ գալիս ու որոշում են քո երկրի ճակատագիրը՝ սխալ է, կործանում են այս երկիրը իրենց պարզունակությամբ, սրանց մոտ ամեն ինչ խառնված է` փողերն հաշվելու արանքում քաղաքականություն են իրականացնում: ԱԺ-ում կան պատգամավորներ, որոնք Եվրախորհրդարանը չեն տարբերում Եվրախորհրդից»: Նրա խոսքերով՝ դրանում մենք էլ ենք մեղավոր, որովհետև նման մարդկանց հանդուրժում ենք:
«Ես խոստանում եմ այս իշխանություններին՝ իմ ընկերների, իմ կուսակցության անունից, Սարյանում մնացող բոլոր ակտիվիստների անունից, ձեզ հանգիստ չենք տալու: Խնդիրներ կան, դժվարություններ կան, բայց, համոզված եղեք, նահանջող չկա, ինչքան սրանք մեզ կատաղեցնեն, բայց մեր սերն ու միասնականությունը հաղթելու է»,- իր ելույթը եզրափակեց ՀՀՇ վարչության նախագահը: