ՀԱԿ արտաքին հարաբերությունների հանձնաժողովի անդամ Վլադիմիր Կարապետյանը ՀԱԿ հանրահավաքի ընթացքում անդրադարձավ երեկ երեկոյան ԵԽԽՎ Մոնիտորինգի հանձնաժողովի կողմից ընդունված բանաձևին: Նա նշեց, որ սա 2008թ. մարտի 1-ից հետո ընդունված 5-րդ բանաձևն է: Կարապետյանը շեշտեց, որ Վեհաժողովն իր բանաձևում նշել է, որ այսուհետ էլ շարունակելու է մոնիտորինգը նույն թափով:
Կարապետյանն առանձնացրեց բանաձևի մի քանի կետեր: Նա տեղեկացրեց, որ բանաձևի 3-րդ կետում նշված է, որ Վեհաժողովը մտահոգված է Մարտի 1-ի 10 սպանություններով, դրանց չբացահայտվածության հանգամանքով և առաջարկում է իշխանություններին դրանց քննությունը դարձնել մատչելի և թափանցիկ հանրության համար, իշխանությունները պետք է հրապարակեն քննության միջանկյալ կամ վերջնական զեկույց մինչև տարեվերջ:
Կարապետյանի խոսքերով՝ Վեհաժողովի բանաձևի 6-րդ կետում նշվում է, որ առաջիկա խորհրդարանական ընտրությունները կենսական նշանակություն ունեն Հայաստանի ժողովրդավարացման համար և կոչ է անում հաշվի առնել Վենետիկի հանձնաժողովի կողմից արված հանձնարարականները և դիտորդական մեծ խումբ գործուղել Հայաստան:
ԵԽԽՎ-ն նաև անհանգստություն է հայտնում արդարադատության համակարգի գործունեության վերաբերյալ: Բոլոր ոլորտներում ծաղկող կոռուպցիան ևս մտահոգում է ԵԽԽՎ-ին, ինչն, ըստ բանաձևի, բացասաբար է անդրադառնում ժողովրդավարության հաստատման վրա:
Կարապետյանը նշեց, որ ԵԽԽՎ բանաձևում խոսվում է ոստիկանական համակարգում անհրաժեշտ բարեփոխումների մասին, կոչ է արվում ոստիկանությունը վերցնել քաղաքացիական վերահսկողության տակ, հիմնել ներքին գործերի նախարարություն: Մտահոգիչ է համարում ոստիկանության կողմից ցուցաբերվող դաժանությունների փաստերը:
Ըստ Կարապետյանի՝ հակասություններ կան բանաձևի խոսքի ազատությանը վերաբերող կետում: Նա պարզաբանեց, որ մեկ նշվում է, թե հեռուստառադիոհեռարձակման մրցույթը նորմալ է անցել,- «Ա1+»-ի վերաբերյալ խոսք չկա,- բայց նաև շեշտվում է, որ այն չի նպաստել բազմակարծությանը և կոչ է արվում նոր մրցույթ անցկացնել:
Կարապետյանը նկատեց, որ հարց է ծագում, թե արդյոք այս բանաձևից հետո կարելի՞ է ասել, որ Մարտի 1-ի էջը փակված է. «Փակողը տարբեր միջազգային վեհաժողովները չեն, այլ մենք՝ ՀՀ ժողովուրդը: Վեհաժողովը չէ, որ վերանվաճեց Ազատության հրապարակը և հասավ քաղբանտարկյալների ազատմանը, մնացած նպատակներին էլ մենք կհասնենք մեր ուժերով»: