Ադրբեջանական APA լրատվական գործակալությանը տված հարցազրույցի ժամանակ Եվրոպայի և Ասիայի հարցերով ԱՄՆ պետքարտուղարի տեղակալի օգնական Էրիկ Ռուբինն անդրադարձել է Ղարաբաղյան հակամարտության կարգավորմանը.
«ԱՄՆ-ը՝ որպես ԵԱՀԿ Մինսկի խմբի համանախագահող երկիր, շարունակում է հավատարիմ մնալ հակամարտող կողմերի կատարած աշխատանքներին։ Նպատակը խաղաղ ու տևական ճանապարհով Ղարաբաղյան հակամարտության կարգավորման հասնելն է, որը պետք է հենված լինի Հելսինկյան եզրափակիչ ակտի 3 սկզբունքների վրա. ուժի չկիրառում, պետության տարածքային ամբողջականություն և ժողովուրդների ինքնորոշման իրավունք։
Թեև «հիմնարար սկզբունքների» վրա տարվող աշխատանքները Կազանում չավարտվեցին, նախագահներ Սարգսյանն ու Ալիևը Մեդվեդևի հետ համատեղ հայտարարեցին, որ փոխադարձ համաձայնության են եկել մի շարք հարցերի շուրջ։ Նրանք նաև համաձայնության են եկել «հիմնարար սկզբունքների» վրա տարվող աշխատանքների շարունակման շուրջ, որոնք շրջանակների դեր են կատարելու խնդրի լիակատար խաղաղ կարգավորման համար։
Հակամարտող կողմերը ԵԱՀԿ Մինսկի խմբի միջնորդների օգնությամբ շարունակում են իրենց աշխատանքը՝ ընդհանուր հայտարարի հասնելու համար։ ԱՄՆ-ն օգնում է կողմերին՝ պարզելու իրենց դիրքերը և հարթելու միմյանց միջև գոյություն ունեցող տարաձայնությունները՝ պայմանավորվածություններ ձեռք բերելու հարցում։
Ղարաբաղյան հակամարտությունը չի կարող կարգավորվել ռազմական ճանապարհով։ Միայն բանակցությունները ճանապարհ կհարթեն տևական խաղաղության ու կայունության առջև և նոր հնարավորություններ կստեղծեն տարածաշրջանային զարգացման ու համագործակցության համար»։
