Lenta.ru-ի փոխանցմամբ՝ Թուրքիայի Ազգային մեծ ժողովը (ԹԱՄԺ) այսօր ձայների մեծամասնությամբ ընդունել է անդրսահմանային օպերացիաների ժամկետը մեկ տարով երկարաձգելու մասին որոշում։
Դրանով թուրքական բանակը հերթական անգամ իավունք է ստանում ռազմական գործողություններ իրականացնել Հյուսիսային Իրաքում բազավորված և Թուրքիայում ահաբեկչական հռչակված ու արգելված Քրդստանի աշխատավորական կուսակցության (PKK) զինյալների դեմ։ Բացի այդ, թուրքական բանակը մեկ տարի կարող է ռազմական գործողություններ վարել նաև Թուրքիային սահմանակից այլ երկրներում։
Հիշեցնենք, որ անդրսահմանային օպերացիաների ժամկետը սպառվում էր հոկտեմբերի 17-ին։ 1950 թվականից ի վեր՝ ԹԱՄԺ-ը 32 անգամ կառավարությանն արտոնել է երկրի սահմաններից դուրս ռազմական գործողություններ իրականացնել, և սա 33-րդ դեպքն է։
Առաջին անգամ այդ հարցը ԹԱՄԺ-ում քննարկվել է 1950 թվականի դեկտեմբերի 6-ին, երբ նա արտոնեց թուրք զինծառայողների մասնակցությունը ՄԱԿ-ի խաղաղապահ գործողություններում։ Հաջորդ դեպքերը վերաբերում են Կիպրոսին, Պարսից ծոցին, Հյուսիսային Իրաքին, Աֆղանստանին, Բոսնիա-Հերցեգովինային, Կոսովոյին, Մերձավոր Արևելքին, ծովահենությանը և այլն։
