Բրիտանական Dailyrecord.co.uk պորտալը հրապարակել է աշխարհի ամենավտանգավոր ֆուբոլային ակումբների ցանկը, որի ֆուտբոլիստները հաճախ ստիպված են լինում ռիսկի ենթարկել իրենց կյանքը։ Բրիտանական պորտալի «սև ցուցակում» ընդգրկվել են միանգամից երկու ռուսական ակումբներ։ Ավելին, նրանք գլխավորել են այդ ցանկը։
Ստորև ներկայացվում է այդ «սև ցուցակը».
1. «Անժի» (Մախաչկալա) – Մախաչկալայում այնքան վտանգավոր է, որ ֆուտբոլիստներն այնտեղ գտնվում են միայն խաղի օրերին, իսկ հանդիպման եզրափակիչ սուլոցից հետո մեկնում են դրանից 1000 մղոն հեռավորության վրա (Մոսկվայի մոտ) գտնվող իրենց անվտանգ մարզաբազան։ Կամերունցի աստղ Սամուել Էտո’ոյի, որին օլիգարխ Սուլեյման Քերիմովը դարձրել է աշխարհի ամենաբարձր վարձատրվող ֆուտբոլիստը, ժամանման օրը Մախաչկալայում տեղի ունեցած փոխհրաձգության արդյունքում սպանվել է 5 մարդ։
2. «Թերեք» (Գռոզնի) – Ոչ բավարար արդյունքների համար «Թերեք»-ի գլխավոր մարզչի պաշտոնից հեռացվեց հոլանդացի լեգենդար մասնագետ Ռուուդ Գուլիտը, որին վերջնագիր էին ներկայացրել. «Կա՛մ հաղթիր, կա՛մ դու խնդիրներ կունենաս»։ Այս վերջնագրի հեղինակն անձամբ Ռամզան Կադիրովն է՝ Չեչնիայի նախագահի որդին, ով տանը պահում է առյուծներ ու վագրեր, և որի ընկերն է սկանդալային բռնցքամարտիկ Մայք Թայսոնը։
3. «Մարսել» (Ֆրանսիա) – Վերջին մի քանի ամիսներին «Մարսել»-ի 10 աստղեր ենթարկվել են զինված հարձակման։ Թիմի բրազիլացի պաշտպան Վիտտորինո Հիլթոնը նախընտրեց տեղափոխվել «Մոնպելիե» այն բանից հետո, ինչ Մարսելում թալանվեց նրա տունը, նրան դաժան ծեծի ենթարկեցին, իսկ ընտանիքի անդամներին պատանդ վերցրին։ Նշվում է, որ թիմի արգենտինացի կիսապաշտպան Լուչո Գոնսալեսն ակումբի սեփականատերերին աղաչել է խզել պայմանագիրն այն բանից հետո, ինչ նրա տուն ներթափանցած թալանչիները սպառնացել են նրան և նրա աղջկան, ապա առևանգել նրա ոսկեղենը, կրեդիտ քարտերը և թանկարժեք ավտոմեքենան։
4. Տոգոյի հավաքական – 2010 թվականին Անգոլայում գնդակոծվել է Տոգոյի հավաքականի ֆուտբոլիստների ավտոբուսը, որն ուղևորվում էր Աֆրիկայի գավաթի խաղարկությանը։ Արդյունքում, սպանվել էր ավտոբուսի վարորդը, իսկ պաշտպաններից մեկն ու դարպասապահը հրազենային ծանր վերքեր էին ստացել։ Ընդհանուր առմամբ, հարձակումից տուժել էր 8 մարդ՝ ներառյալ լրագրողներն ու թիմի երկու բժիշկները։
5. «Պորտուգեզա» (Բրազիլիա) – Թիմի տնային պարտություններից մեկից հետո թիմի հանդերձարան են ներխուժել 4 զինված անձինք, ովքեր դժգոհ են մնացել իրենց թիմի խաղից և ֆուտբոլիստներին զգուշացրել են, որ դա չուղղելու դեպքում նրանք մեծ խնդիրներ կունենան։
6. «Ռոմա» (Իտալիա) – Թիմի սևամորթ խաղացողները բազմիցս ենթարկվել են հարձակման։ Օրինակ, 26-ամյա Ահմեդ Բարուսոյին անհայտ անձինք ծեծի էին ենթարկել նրա համար, որ նա հրաժարվել էր լքել ակումբը։
7. «Ցրվենա Զվեզդա» (Բելգրադ) – 2008 թվականին թիմի ֆանատը դատապարտվեց 10 տարվա ազատազրկման՝ ոստիկանին հրավառության միջոցով սպանելու փորձի համար։ Իսկ անցած տարի տեղի ունեցած ծեծկռտուքի ժամանակ սպանվեց ֆրանսիական «Թուլուզ»-ի ֆանատը, և ծեծի ենթարկվեց Բելգրադի «Պարտիզան»-ի երկրպագուն։
8. «Ինդեպենդիենտե» (Արգենտինա) – արգենտինացի կիսապաշտպան Մաթիաս Ալմեյդան թիմի հետ պայմանագիր ստորագրելուց անմիջապես հետո՝ դեռ թիմի նոր մարզաշապիկը չհագած, ստիպված եղավ լքել ակումբը, քանի որ իմացավ, որ իր ընտանիքի անդամները գտնվում են առևանգիչների թեկնածուների թվում։ Ֆուտբոլիստն անհապաղ վերադարձավ Եվրոպա։
9. «Սելեսսիոն դե Կորոիկո» (Բոլիվիա) – Այն ֆուտբոլիստը, ով կորոշի հագնել այս ակումբի մարզաշապիկը, նա պետք է պատրաստ լինի ամեն օր ռիսկի ենթարկել իր կյանքը։ Այստեղ ֆուտբոլիստներին սպառնում են ոչ թե զինված ավազակները, այլ՝ բնությունը։ Մարզաբազա տանող ուղին անցնում է «Մահվան ճանապարհով»։ Տեղաբնիկները հենց այդպես են որակել այդ 70 կիլոմետրանոց ճանապարհը, ուր ամեն տարի զոհվում է ավելի քան 100 մարդ։
