«Եվրո-2012»-ի ընտրական փուլի Հայաստան-Մակեդոնիա հանդիպման նախօրեին «Հանրապետական» մարզադաշտի մամուլի սրահում կայացած ասուլիսում ՀՀ հավաքականի գլխավոր մարզիչ Վարդան Մինասյանը հայտարարեց, որ մեր թիմը հանդիպման սկզբից ագրեսիվ ֆուտբոլ է ցուցադրելու և փորձելու է ճնշում գործադրել մրցակցի վրա:
Գնահատելով թիմի ընդհանուր վիճակը` Մինասյանն ասաց, որ խնդիրներն ավելացել են. «Պրոբլեմները շատացել են. ինչպես գիտեք 21 հոգի ենք հրավիրել, սակայն Արազ Օզբիլիսը վնասվածքով է եկել, Հրայր Մկոյանը կբացակայի՝ դեղին քարտերի պատճառով, մինչև հիմա դեռ պարզ չէ Ռոբերտ Արզումանյանի մասնակցությունը, բայց 90 տոկոսով նա չի կարողանա մասնակցել հանդիպմանը: Մեր տրամադրության տակ եղած մյուս 18 հոգին նորմալ վիճակում են` թե՛ ֆիզիկապես, թե՛ հոգեպես: Թիմի տրամադրությունը բարձր է»:
Մակեդոնացիների ընտրանուն անդրադառնալով` Մինասյանը նշեց, որ նրանք բավական կազմակերպված թիմ ունեն, և նոր մարզիչը նույնպես ուժեղացրել է թիմը:
«Մակեդոնիայի հավաքականի բոլոր 8 խաղերը դիտել եմ: Նրանք ոչ մի դեպքում խաղով չեն պարտվել, խաղեր են եղել, որ Մակեդոնիան նույնիսկ առավելություն է ունեցել մրցակցի նկատմամբ: Ուղղակի ինչ-որ բան չի ստացվել: Նոր մարզչի գալով՝ նրանք ավելի կազմակերպված են խաղում: Առանց Պանդևի՝ Մակեդոնիայի խաղում տարբերություն կլինի. նա թիմի լիդերն է, բայց չգիտեմ որ կողմը կլինի` դրական, թե բացասական»:
Նախորդ հանդիպումների համեմատ՝ տակտիկական փոփոխություններ նույնպես կլինեն. «Ավելի ագրեսիվ պետք է խաղանք, ինձ թվում է ճիշտը հենց սկզբից ճնշում գործադրելն է»:
Մինասյանը նաև նշեց, որ Եվրոպայի առաջնության եզրափակիչ փուլ չմտնելը ձախողում չի համարի և վերջում հույս հայտնեց, որ վաղը կհաղթենք:
Լուսանկարը՝ TOTALFOOTBALL-ի
