«Հայաստանի երեք նախագահներից Ռոբերտ Քոչարյանը եղել է ամենաամբիցիոզը, նա եղել է վերկուսակցական առաջնորդ…Այսինքն Ռոբերտ Քոչարյանը հանդիսացել է ազգը միավորող ուժ»,- այսօր հրավիրված մամուլի ասուլիսի ընթացքում, անդրադառնալով Ռոբերտ Քոչարյանի հավանական վերադարձին, նման դիտարկմամբ հանդես եկավ «Սոցիոմետր» սոցիոլոգիական կենտրոնի տնօրեն Ահարոն Ադիբեկյանը:
Միաժամանակ՝ նա նկատեց, որ ՀՀԿ-ի վարկանիշն ավելի «ուժեղ» է, իսկ Քոչարյանը հետ է մնում Սերժ Սարգսյանից, Տիգրան Սարգսյանից, Գագիկ Ծառուկյանից, Լևոն Տեր-Պետրոսյանից, Րաֆֆի Հովհաննիսյանից: Ահարոն Ադիբեկյանի խոսքերով՝ Ռոբերտ Քոչարյանը չի զիջում միայն Վահան Հովհաննիսյանին:
Ըստ սոցիոլոգի՝ Ռոբերտ Քոչարյանի դիրքերը թուլացնում է նաև Մարտի 1-ը և նրա ընտանիքի սոցիալական կարգավիճակը:
Ադիբեկյանը հանգեց այն եզրակացությանը, որ Քոչարյանի վերադարձը «պետք է լինի շատ սահմանափակ, որ մեր քաղաքական ջրերը շատ չպղտորվեն»: Այսինքն, նրա վերադարձը կարելի է համարել «աբստրակտ», իսկ Ռոբերտ Քոչարյանի «բազեյատիպ դիրքը» ավելի շատ վնաս կբերի Հայաստանին, քան օգուտ՝ թե՛ ներքին, թե՛ արտաքին դաշտում: