Հայ ազգային կոնգրեսի ներկայացուցիչ Գուրգեն Եղիազարյանը լկտիություն և մեծագույն ստորություն է որակում ԵԽԽՎ մոնիտորինգի հանձնաժողվի կողմից ընդունված, Մարտի 1-ի էջը փակող բանաձևի ընդունումը: Նման գնահատականներ նա հնչեցրեց «Առաջին լրատվական»-ի հետ զրույցում:
«Պատկերացնո՞ւմ եք Մարտի 1-ի զոհերի հարազատների վիճակը, մարդկանց, ում երեխաների գերեզմաններին խոտը չկանաչած` ԵԽԽՎ նման բանաձև է ընդունում: Սա լկտիություն և ստորություն է: Մարտի 1-ի էջը փակում են Հայաստանում նոր սպանությունների՞ համար, սրա՞նք են Եվրոպայի արժեքները, եվրոպական ժողովրդավարությունը»,- հռետորական հարց հնչեցրեց ՀԱԿ ներկայացուցիչը` միաժամանակ հավելելով, որ եվրոպական կառույցի կողմից Մարտի 1-ի էջի փակումը նույնն է, ինչ, ասենք, Հայաստանի կողմից ԱՄՆ նախկին նախագահ Քենեդու սպանության հարցի փակումը:
Գուրգեն Եղիազարյանի համոզմամբ՝ Եվրոպան, որքան էլ ժողովրդավար, Հայաստանի հանդեպ երկակի չափորոշիչներ է կիրառում և Մարտի 1-ի էջը փակելու համար ավելի քան առարկայական գին է ուզելու, այն է՝ Լեռնային Ղարաբաղի հարցի ոչ հայանպաստ լուծում:
Ամփոփելով՝ ՀԱԿ ներկայացուցիչը ընդգծեց, որ Հայաստանին արհավիրքներից փրկվելու, կանոնակարգված նախագահ ունենալու համար ժամ առաջ արտահերթ ընտրություններ են անհրաժեշտ:
Նշենք, որ ԵԽԽՎ Մոնիտորինգի հանձնաժողովի նիստում երեկ քննարկվել և ընդունվել է Հայաստանի հարցով համազեկուցողներ Ջոն Պրեսկոտի և Աքսել Ֆիշերի հեղինակած «Ժողովրդավարական հաստատությունների գործունեությունը Հայաստանում» խորագրով բանաձևը:
Հիշեցնենք, որ բանաձևի նախագծում, ողջունելով մարտիմեկյան իրադարձությունների հետևանքով կալանավորվածներին ազատ արձակելու` Սերժ Սարգսյանի նախաձեռնությունը, Վեհաժողովը համարում էր, որ ընդդիմության և իշխող կոալիցիայի միջև արդյունավետ երկխոսության մեկնարկը, վերջին համաներման արդյունքները, 2008-ի մարտի 1-ի 10 զոհերի մահվան հանգամանքների հետաքննությանը նոր թափ հաղորդելը նշանակում է, որ 2008-ի մարտյան իրադարձությունների էջը, ի վերջո, կարելի է փակված համարել:
Երեկ ԵԽԽՎ-ում Ստրասբուրգում գտնվող հայաստանյան պատվիրակության անդամ, «Ժառանգություն» խմբակցության ներկայացուցիչ Զարուհի Փոստանջյանից տեղեկացանք, որ Հայաստանում մեծ քննադատության արժանացած ձևակերպումները, փաստորեն, պահպանվել են, և ինչ-որ կոսմետիկ, աննշան լրացումներ են արվել: Ինչպես տեղեկացրել էինք, Զ. Փոստանջյանը հինգ առաջարկություն էր ներկայացրել, բայց դրանք երեկ, ըստ էության, չեն ընդունվել:
