ՈւԵՖԱ-ի պաշտոնական կայքը փոքրիկ անդրադարձ է կատարել «Եվրո-2012»-ի ընտրական փուլի B խմբում ընդգրկված Հայաստանի հավաքականին և հարցազրույց վերցրել մեր ընտրանու առաջատար Հենրիկ Մխիթարյանից:
Հոդվածում ասվում է, որ Հայաստանի հավաքականը շատերի համար անսպասելիորեն խառնվեց խմբից դուրս գալու պայքարին և ընտրական փուլի ավարտից 2 տուր առաջ առաջին երկու տեղերից մեկը զբաղեցնելու բոլոր հնարավորություններն ունի:
Հայաստանի հավաքականի հաջողություններն իսկապես շատերին են զարմացրել, սակայն ոչ Հենրիկ Մխիթարյանին. նրա կարծիքով ամեն ինչ օրինաչափ է:
«Առանց պատճառների և միանգամից արդյունքի չեն հասնում: Մեր թիմում շատ են երիտասարդ ֆուտբոլիստներն, ովքեր արժանացել են մարզիչների վստահությանը: Նրանք հասկանում են իրենցից ինչ է պահանջվում և ամեն ինչ անում են վստահությունն արդարացնելու համար: Մեր հավաքականի խաղը կառուցված է ֆուտբոլիստների և մարզիչների փոխադարձ վստահության վրա: Բոլորի մոտեցումը նույնն է` մարզիչների, խաղացողների, ֆեդերացիայի ղեկավարության, թիմի բժիշկների: Մենք ամբողջական, միասնական և առողջ մեխանիզմ ենք:
Հարկավոր է միայն հաջող խաղալ Մակեդոնիայի և Իռլանդիայի հետ: Պետք չէ այժմ մտածել Եվրոպայի առաջնության եզրափակիչ փուլում հայտնվելու շուրջ: Այժմ անհրաժեշտ է մտածել միայն Մակեդոնիայի հետ կայանալիք խաղի մասին: Միավորները վերջում կհաշվենք: Հիմա պետք է կենտրոնանալ այն միակ հանդիպման վրա, որում մենք պարտավոր ենք հաղթել, այդուհետ արդեն կմտածենք Իռլանդիայի հետ հանդիպման մասին:
Հարկավոր է ցուցադրել այն խաղը, որը մեզ հաջողություն է բերել ընտրական փուլի վերջին հանդիպումներում, հավատալ մեր ուժերին և ամբողջական նվիրումով գործել: Ես հավասարաչափ լավ եմ հասկանում խաղընկերներիս և խաղադաշտ եմ դուրս գալու հաղթանակի հավատով:
Մեր առաջատարը թիմն է: Հենրիկ Մխիթարյանը միայնակ ոչինչ չի կարող անել: Առանց թիմի, առանց խաղընկերներիս ես ես չեմ: Շնորհակալ եմ խաղընկերներիս՝ իրենց և իմ նկատմամբ հավատի համար: Մենք բոլորով մեկ նպատակ ունենք:
Ամենակարևորն այն է, որ Հայաստանում երեխաները սկսել են համեմատվել հայ ֆուտբոլիստի հետ: Մենք ամեն ինչ անում ենք մեր ժողովրդին երջանկացնելու համար, և եթե հայ ֆուտբոլիստների մեջ արդեն կուռքեր կան, ուրեմն ճիշտ ճանապարհի վրա ենք: Ինձ համար մեծ պատիվ է լինել մեկն, ում ցանկանում են նմանվել պատանի ֆուտբոլիստները»,- Հենրիկ Մխիթարյանի խոսքերն է մեջբերում ՈւԵՖԱ-ի պաշտոնական կայքը:
