Եվրոպայից ձյունն ու սառնամանիքները դեռ չեն հեռացել, իսկ այնտեղ արդեն սկսվել են ջրհեղեղներ:
Բալկանյան թերակղզին երրորդ օրն է՝ գտնվում է ցիկլոնի ազդեցության տակ: Անընդհատ տեղացող անձրևների պատճառով ամբողջությամբ ջրի տակ են անցել մի քանի քաղաք Ալբանիայում, Բոսիա-Հերցեգովինայում:
Իշխանությունները Ալբանիայում ստիպված տարհանել են ավելի քան 13 հազար մարդու: Նրանց տները գրեթե ամբողջովին ավերվել են: Ջրի տակ են անցել երկրի հյուսիսային շրջանները: Հիմնական հարվածը հասցվել է Շքոդեր շրջանին: Մի քանի հազար մարդ, որոնց փրկարարները չեն կարողանում տարհանել այս շրջանից, պատանդ են մնացել ջրին: Օգնության են հասել ոստիկանությունը, բանակը, փրկարարները: Բոսնիայի իշխանությունները դիմել են բնակչությանը` ունեցած նավակներն իրենց տրամադրելու խնդրանքով, քանի որ սա միակ փոխադրամիջոցն է աղետի գոտի դարձած շրջաններում:
Ավելի ծանր է իրավիճակը Լեհաստանում, որտեղ ցրտերի և ձնաբքերի պատճառով արդեն զոհվել է 40 մարդ: Ավելի քան 150,000 մարդ մնացել են առանց ջեռուցման: Ավստրիան էլ է տուժել ցրտերից: Մի քանի տասնյակ բնակավայր կտրված են արտաքին աշխարհից: Մի քանի հազար մարդ էլ մնացել է առանց էլեկտրաէներգիայի, քանի որ էլեկտրական լարերը չեն դիմացել թաց ձյան ծանրությանը: Մասնագետների կանխատեսումներով՝ տեղումները դեռ մեկ շաբաթ էլ չեն դադարի: