Ադրբեջանի նախագահի աշխատակազմի արտաքին հարաբերությունների բաժնի ղեկավար Նովրուզ Մամեդովը Trend գործակալությանը տված մեկնաբանությունում հայտնել է, որ Աստանայում ԵԱՀԿ գագաթնաժողովը բեկումնային չէր Լեռնային Ղարաբաղի հարցի կարգավորման համար, սակայն այն հայտարարությունը, որն արվել է նախագահների կողմից, կարևոր է ընթացքի ապահովման առումով: «Այդ հայտարարությունը շատ կարևոր է: Այն ընդունվել է 3+2 ձևաչափով, ինչը, իր հերթին, ցույց է տալիս, որ ներկա պահին ավելի շատ ջանքեր են ներդրվում ղարաբաղյան հակամարտության կարգավորման հարցում. դա ավելացող ջանքերի ապացույցն է»,- ասել է Մամեդովը:
Հիշեցնենք, որ Աստանայում ընդունվել էր հայտարարություն, որի տակ ստորագրել էին Հայաստանի և Ադրբեջանի նախագահները, ինչպես նաև Մինսկի խմբի համանախագահ երկրների՝ Աստանայում գտնվող պատվիրակությունների ղեկավարները` ԱՄՆ պետքարտուղար Հիլարի Քլինթոնը, Ֆրանսիայի վարչապետ Ֆրանսուա Ֆիյոնը և Ռուսաստանի նախագահ Դմիտրի Մեդվեդևը: Փաստաթղթում կոչ է արվում ջանքեր գործադրել հարցի կարգավորումն ավարտին հասցնելու համար: