Ադրբեջանական 1news.az-ին տված հարցազրույցի ժամանակ միջազգային անվտանգության հարցերով ԱՄՆ պաշտպանության նախարարի տեղակալ Ալեքսանդր Վերշբոուն անդրադարձել է Ղարաբաղյան հակամարտության կարգավորմանը.
«ԱՄՆ-ը բոլոր ջանքերը գործադրում է, որպեսզի վստահ լինի, որ պաշտպանության ոլորտում Ադրբեջանի հետ փոխհամագործակցությունը նպաստում է տարածաշրջանի կայունությանն ու չի խաթարում Ղարաբաղյան հակամարտության խաղաղ կարգավորման ուղղությամբ տարվող ջանքերը։
Որպես ԵԱՀԿ Մինսկի խմբի համանախագահող երկիր՝ ԱՄՆ-ի կառավարությունն աջակցում է խաղաղ ճանապարհով Ղարաբաղյան հակամարտության կարգավորման ջանքերին, որոնք հիմնված են Հելսինկյան եզրափակիչ ակտի սկզբունքների վրա՝ հաշվի առնելով ուժի կամ ուժի սպառնալիքի չկիրառումը, տարածքային ամբողջականությունը և ժողովուրդների ինքնորոշման իրավունքը։
ԱՄՆ-ը նախկինի նման երկկողմ հիման վրա, ինչպես նաև Մինսկի խմբի միջոցով, փորձում է Հայաստանի և Ադրբեջանի ղեկավարներին հասցնել այն, որ հակամարտությունը չի կարող կարգավորվել ուժային ճանապարհով։ Մենք շարունակում ենք հակամարտող կողմերին զսպվածության կոչեր անել՝ սխալվելու վտանգը նվազագույնի հասցնելու համար։
ԵԱՀԿ Մինսկի խմբի համանախագահները շարունակում են Հայաստանին ու Ադրբեջանին աջակցել՝ գիտակցելու համար, որ բաց հակամարտության վերադարձը կունենա աղետալի հետևանքներ թե՛ հակամարտող երկրների, թե՛ ողջ տարածաշրջանի համար։ Մենք նորից կրկնում ենք մայիսի 26-ին նախագահներ Օբամայի, Մեդվեդևի և Սարկոզիի՝ Դովիլում արած հայտարարությունը, որ միայն բանակցային ճանապարհով հակամարտության կարգավորումը կարող է հանգեցնել խաղաղության, կայունության ու հաշտեցման»։
