Այն բանից հետո, երբ մամուլում հայտնվեցին ամերիկյան դիվանագիտության գաղտնի փաստաթղթերը, ԱՄՆ դիվանագիտությունը լուրջ խնդիրների առաջ է կանգնել: Պետքարտուղար Հիլարի Քլինթոնը արդեն մի քանի օր է, շուրջօրյա հեռախոսային բանակցություններ է վարում օտարերկրյա իր գործընկերների հետ` ներողություն խնդրելով WikiLeaks-ի հրապարակումներում տեղ գտած մանրամասնությունների համար, ինչպես նաև բացատրելով ստեղծված իրավիճակը: Այս մասին փոխանցում է France Presse լրատվական գործակալությունը: Գործակալությունը նաև տեղեկացնում է, որ նմանատիպ հեռախոսային զրույցներ է ունեցել նաև ԱՄՆ նախագահ Բարաք Օբաման:
Հայտնի է դարձել նաև, որ Բարաք Օբամայի վարչակազմը նախատեսում է հետ կանչել բոլոր այն դիվանագետներին, ովքեր «նկատվել են» WikiLeaks-ի հրապարակած փաստաթղթերում, քանի որ նրանց` այդ երկրներում մնալն այլևս անհնար է և վտանգում է այդ դիվանագետների կյանքը:
Ամենահավանական դիվանագետներից, որը կարող է հետ կանչվել, Լիբիայում ԱՄՆ դեսպան Ջինա Կրեցն է, որը ԱՄՆ տեղեկություններ էր հայտնել Լիբիայի առաջնորդ Մուամար Քադաֆիի ուկրաինուհի սիրուհու մասին: Ամենաշատ տեղեկություններ հայտնած ամերիկյան դիվանագետները, որոնք աշխատում են Թուրքիայում, հնարավոր , որ նույնպես հետ կանչվեն:
